Na Todan Le Mizia

0
569

Minung in mizia bang aw lo kan nei cio ih cui’ kan mizia bang aw lo khal in san tampi a rak nei theu. Mithiam pawl in kum reizet an zingzawi rero hnu ah minung kan todan pawl ih san a nei theh ti a si ih phun 5 in an then. Tui an thendah ahcun tokham parih kan todan a khihhmuh bik in a lang.

Himi an zingzawinak hi a dik thluh rori tinak cu a si cuang lo ih a tamsawn an hmuhsuahmi sung ihsin an pholang mi a si.

1.Zuk hmaisabik ih ka hmuh vek in ke kaak ,khukcip ih to theu pawl mizia cu – Buainak pakhat khat an ton tikah reipi an ruat buai ciamco dah lo ih thu relcatnak an nei lohli theu men. Kom an nuam ih ziangtik lai caan khalah hahdam zet in an um thei . Nuahak bangin an thinlung a tha ih thincin an nei lo tlangpi ti a si .

2.Ke pakhat khuk tlunih ret tahrat ih to theupawl mizia – A tak ih tuah aiin ruat[ dream]  rero ih caan hman an duhsawn. An thluak a thazet ih thilthar tuahdan an thiamzet tlunah pawlkom ih hruaitu an si duh tlangpi. An phur thei ringring ih khualtlawn paih zettu an si. Thu relcatnak an tuah zo tikah an thinlung an tibuai duh nawn lo ih huai zetin hmai an nawr ngam ringring ti a si.

3.Ke hnuai ciip ih tlun lam kaak derder thawn to theupawl ih mizia – Hipawl hi mai thu duhzet lole mai ruahnak te ih um duhzet pawl an si. Midang ih tikfial an ngaina lo ih phurrit pek khal an duh lo zet. Thuamhnaw lamah an cangkang zetih anmai kaih ding an hril thiamzet thung. An tlaksamnak bikmi pakhat cu thil ziangkhal thupi tuk ih ruah an nei lemlo ti a si .

4.Ke ciip ih to theupawl mizia – Hipawl hi ziangtik lai caan khalah a tlaitu si an duh dah lo ih thleng hmaisatu an si ringring theu. An teima zetih an zuam zet tlunah tuah duhnak thinlung hnget an nei. An thinlung a tlaitluang ih kom nuamzet an si tlunah a hmun le caan mil in an um thiam vivo ti a si.

5.Ke hnih rori kawi deuh ih to theupawl mizia – Fiang deuh in kan rel asile model pawl todan tlangpi a si ko. Hipawl hi ziangtik hman ah an manhlap dah lo ih a caan te ih thil tuah theupawl an si. Hna an tuan khalah caan bi-khiah neizet in an tuan ih lungruh caan an nei theu. Tumtahnak sangzet an nei bangin an zuam ih an taksa mawinak an ngai pawimawh zet si.

Na zum le zum lo ah mawh kan phur lo, mithiam pawl ih an zingawidan a si bangin mi tampi ih theih cakzetmi a si ruangah kan tarlang ve men a si.