Mai Fanu Rori Zuartu Nu Pakhat




Myanmar khawpi Mandalay ah nunau kum 13 mite cu China ih zuar dingin mawtaw thawn phurh a si ih mi raltha pawl cun zuar dingmi nunau nute cu an runsuak ngah. Kum 13 nute zuartu hi misual an si ding tiih ruah a silai ah amah hringtu Nu rori a rak si ih a tapa thinheng tuk cun a Nu siatsuah a tum phah.

Myanmar ram Rakhine ramthen ah sungkua pakhat harsa zet cu pa nei nawn lo an si bangin an Nubik Daw Ting Ting Aye in fanu kum 13 mi le a U mipa pakhat a hmeihpi. An harsat tuk ruangah a fanu cu palastic hawl theu ih a upa khal kuli hlawh ringring a si. Nikhat ei ding hawl cop an si ih rethei zet sungkua an si.

Nikhat cu Daw Khin San Myint timi China puaisa cu Nu Ting Ting Aye inn ah a thlengih an fanu thuhla cu an reltlang. Nu Ting Ting Aye cun a fanu kum 13 mite cu Daw Khin San Myint hnenih zuar dingin a lungkim ih sumpai tamzet an hlan aw.

Nunau nute upa cu hnatuannak ihsin a ra tlun tikah A Nu Ting Ting Aye in kan harsa si na nau hi Mandalay rawldawr pakhat ah hnatuan ve seh, a hnatuannak ding hrang a Pinu khal ka befel thluh zo ruangah va thlah aw a ti ih tlangval pate khal ziangthei loin a nau cu Mandalay ah a thlah . Asinan a unau nu cu zuar dingmi a rak si ih puaisa kut ah a retmi a rak sinawn.

Mandalay ah nunau kum 13 mi cu China ram ih zuar an tum laiah runsuah ngah a si tiin thu a thang ciamco tikah Rakhaine ram ih um Nu Ting Ting Aye tei khua mi pawl khal in an rak thei ve ih Nu Ting Ting Aye cu an simthei. na fanu an siko an ti nan, Nu Ting Ting Aye cun ka fanu a silo ,anih cu rawldawr ahsi hna a tuan tiin a rak pha ciamco. Cuti Nubik in a fanu thuhla dik lo zetih a rel ciamco tikah nasa zetih zingawi a si ih thudik an theihsuah phah.

Mai fanu rori zuartu Nu Ting Ting Aye cu palik pawl in an kaifel tikah suithi tamzet a rak lei zomi khal hmuhsuah a si . Afapa cu a Nu’i parah a lungawi lo zetih A nu thairal khal pawi tinak a nei nawn lo a si.