A Ngaihzawngpa Thawn An Umdan Ruangah Vanzam Hnatuan Colhter A Si

0
447

China ram ih vanzam hnatuan fala pakhat cu vanzam sungih a ngaihzawngpa thawn an umdan ruangah a hna ihsin colhter a si. Zovek Nunau hrang khalah mai ngaihzawng pa hnen ihsin nupi si dingih dilnak an ton caan cu an lungawi bik caan a si theu.Asinan China vanzam pakhat ih hnatuan fala nute hrang ahcun a hna caan phahnak a rak sisawn.

Kum 26 mi Jiao cu China Estern Airlines Flight ih hnatuan a si ih Xian ihsin Ychuan pan in an thlawk. Vanzam sung ahcun kum 4 rori a rak kop zomi a ngaizawngpa khal thupte’n a tel ve. Fala nute Jiao cu mipi zohfel ih vanzam sungah a fehkual ih a ngaihzawngpa’i tonak hmun a then cun a darling pa in a nupi si dingin a dil thutthi ih Fala nu khal lungawi le mangbang zet cingin a darling pa’i dilnak cu a cohlang. Cutin mipi lak ahcun an hnam aw le kuah aw in caan an hmang.

Kiangkap mipi khal in an lawmzet ih an zuk sak cece tlunah lungawinak tongkam khal an barh cio. Cuti lungawi zetih caan an hmanlai ahcun thuneitu hnenih ihsin kawhnak a dawngih ‘na hna ihsin banter na si’ an ti.

Thuneitu pawl cun ‘ khualtlawng pawl ngaihsak ding caan a si ih nuamtawlnak caan a si lo , na hna thaten na tuan lo ruangih lo ban kan si’ tiin an theihter.

Fala nute cu tuarthiam loin a tap rero ih mipi cu a hnemtu ah an cangsawn riangri. Vanzam sungih to mipi hrekkhat pawl cu an thinheng zetih fala nute in ziang thilsual hman  a tuah lo ih a hna ihsin ban ding khop mawhnak khal a nei lo ,” tiin an aupi rero a si. [ China Post ]