Zidane Uar Zettu C.Ronaldo




Juventus hmaitlan C.Ronaldo cun Real Madrid ih a pu hlun Zidane a uar zet thu a rel ih Coach pitling le fimzet a si tiin a rel mawi.

C.Ronaldo hi tui season thok ding zawngih Real Madrid suahsantu a si ih Juventus ah a rak lut.Zidane khal Real Madrid coach sinak ihsin a rak bang ve nan,tuahcun Real Madrid coach tuansal dingin a kirsal zo.

C.Ronaldo cun ,” Zidane cun fim zetin player pawl a kaihruai thei tiin ka ruat.Player zaten in lek theh an duh tikah thil harsa zet cu a si rori ding.Asinan,Zidane cu tha zetin hna a tuan ih rualremten player pawl a lekter thei.Cucu thil thatuk rori a si,” a ti.

Zidane hi player a silai ihsin Champions league ,Laliga ,Serie A le World cup pawl cawi theitu a si ih coach dinhmun khal in Real Madrid thawn a rak hlawhtling zet zo.Kum 3 peh rori in Champions league ah a champion pi thei ih kum 2 hrek sungah laksawng 9 lai a cawipi thei.

Real Madrid Captain Ramos khal in ,”Zidane thuhla cu rel mawi sak ciamco a tul ve lo ,Player le Coach dinhmun ih a sulhnu pawl zoh tikah ziangvek a si timi cu a fiangmai.Tleirawl player tha a theithiam ih mi pakhat ih thatnak khal theithiam in a hmangthiam tuk a si,” a ti.