Zidane Thawn Khal Ih Duai Thotho Real Madrid




Laliga round 30nak ah Valencia cun Real Madrid an rak mikhual ih anmai innpi ah 2-1 thawn nehnak an co thei.Valencia hrang Guedes le Garay in goal an thun ih Real Madrid hrang Benzema in goal 1 a thun ve.

Valencia XI ( 4-4-2) : Neto ,Wass ,Garay, Diakhaby, Gaya, Soler,Kondogbia ,Parejo, Guedes ,Gameiro ,Rodrigo.

Real Madrid XI (4-3-3 ) : Navas <Marcelo ,Varane ,Ramos, Odrizola ,Modric ,Casemiro ,Kroos ,Asensio,Benzema ,Vasquez.Thelhbawh : Bale ,Isco ,Diaz, Reguilon ,Cabellos.

Puai an thok ih nawr sawntu um loin an nawr aw ton hngal.Inntek hrang Guedes in khawl a thleh puppo hnu ah mikhual hrang Kroos in khawl a thelh puppi ve.Minute 35nak ah Inntek Valencia in corner an ngah ih an sitmi cu Navas in a rak khamsak,Valencia hmaitlan Guedes in bawhlung a co ih Soler thawn an pek awk detdo hnu ah Valencia hrang a sit goal.Valencia in ti thutthi thawn an nor hnu ah remcang thazet vei 2 an hlah ih goal dang lut hrih loin colh an hmag.

Caan hrek neta sawn an thok ih Real Madrid in sit goal rori an tum.Real Madrid hrang Isco le Bale an luh hnu in an nawr sinsin nan, sit goal thei hrih loin an um.Minute 83nak ah Inntek in corner an ngah ih Parejo sitmi cu dungkham Garay in Valencia hrang a rak sawh goal.Nasa zetin Real Madrid an tang ciamco ih nasa zetin an nawr ve.Minute 90nak ah Real Madrid in corner an ngah ve ih Modric sitmi cu Benzema in a rak sit goal.Real in goal bet an tum zet nan,caan a um nawn lo ih 2-1 thawn caan a cem.

Hitin Real Madrid cu an sung nan,puai 30 ah hmat 57 thawn table 3nak a silai thotho.A tlunah hmat 62 nei hmat 70 nei an um a si.