Zidane In Real Madrid Nehnak A Copi Hngal




Laliga round 28nak hrang Real Madrid cun Coach thar Zidane thawn Celta Vigo an rak mikhual ih 2-0 thawn nehnak an co.Inntek Real Madrid hrang Isco le Bale in goal 1 veve an thun.

Real Madrid XI ( 4-3-3 ): Navas ,Odriozola ,Varane ,Ramos ,Marcelo, Modric ,Kroos ,Isco ,Bale ,Benzema ,Asensio.Thelhbawh:Courtois ,Reguilon ,Ceballos,Nancho,Valverde,Diaz,Mariano.

Puai an thok ih Real Madrid in bawhlung cotam zet thawn remcang tha hawl an tum nan,Celta Vigo an rak tang thei zet ve ih remcang hmu thei lo in le bawhlung khal cotam sawn um loin an nawr aw.Minute 26nak Celta Vigo hrang Gomes in lusawh thazet a nei nan,Navas in thazet in a rak khamsak.Real Madrid tih an nung thei hrih lo nan,minute 27nak ah Kroos in hlaral in khawlsut thazet a nei ih khawl a thelh nerno.Duhtawk aw zetin an nawr aw ih minute 30nak ah Real Madrid hrang Bale in khawlsut thazet a nei ve cu khawlban te lawng a ngah.Celta in an nawr hngal ve ih Boufal in khawlsut thazet a nei ve nan,Captain Ramos in a rak khamsak.Inntek in an nawrsal ih minute 37nakah Ramos in lusawh thazet a nei nan, khawl a thelh ve.Cungcuang sawn um loin caan hrek hmaisa sawn an lek ih goal thun thei an um lo hnu in colh an hmang.

Caan hrek neta sawn an thok ih duhtawk aw zetin an nawr aw thohtho. Khawl kiang ah Real Madrid an buai thei zetih remcang tha tuah aw thei loin an um.Minute 56nak ah Real Madrid hrang Modric in hlaral ihsin a sit goal nan,off side dinhmun ih um Varane in bawhlung a rak kian ruangah VAR zoh a si ih goal pom lo a si.Inntek Real Madrid in an nawr peh ih minute 62nak ah Benzema tuahsak mi thawn Isco in a rak kham goal.Mikhual in sit goal an tum ve zet nan,tih an nung thei nawn lo ih Real Madrid sawn in nasa zetin an nawr.Minute 77nak ah Marcelo a cangvai ih penalty kulhsung ah Bale hrang bawhlung tuahsak in Bale in Real Madrid hrang a sit goal.Inntek an phur sinsin ih lek thazet Asensio in khawlsut thazet a nei nan,khawl a thelh nerno.Cutin goal dang a lut nawn lo ih 2-0 thawn Real Madrid nehnak an co.

Marcelo le Isco in an thiamnak an theihhngilh man lo nan,an taksa a rit tutti lai ih Solari ruangah rinsan awknak an tlasam deuh in a lang.Bale a lek thazet ih Asensio khal bawhlung a duh deuh ti lo cun a lek thazet.Coach Zidane cun minung rem a thiamzia a pholang lala ih Isco aiah Cabellos ,Modric aiah Valverde le Benzema aiah Mariano tiin minung a thleng thiamtuk.

Hitin Real Madrid cu puai 28 lek zomi laliga ah hmat 54 thawn table 3nak ah an um hrih ih an tlunah hmat 56 nei Atletico Mardid le hmat 63 nei Barcelona an umlai a si.