Zarhpi Zan Ah Liverpool vs Chelsea




Premier league round 34nak hrang zarhpi zan myanmar 10pm ah champion tumzet Liverpool in top 4 luh tengteng tum Chelsea an rak mikhual dingih puai a rorum in a sosang tuk ding.

Tui dinhmun premier league top 6 umdan cu Liverpool puai 33 ah hmat 82,Man City puai 32 ah hmat 80 ,Chelsea puai 33 ah hmat 66, Tottenham puai 32 ah hmat 64, Arsenal puai 32 ah hmat 63 le Man United puai 32 ah hmat 61 pawl an si.

Champion ding le top 4 hrang zianghman a fiang thei hrih lo ih puai cem zik tiang zuam aw tuito ding an si.

Liverpool lamah hremmi player an um lo ih dam lo khal Chamberlain le Lallana lawng an si thlang.Gomes a dam fel zo ih duh cun hman theih in a um.Chelsea khal in hremmi player an nei ve lo ih Drinkwater a dam thei hrih lo tilo cu upa ah dam lo ciamco an nei lo.

Chelsea in Liverpool Innpi ih lek nuam an ti zetih tui season carabao cup khalah 1-2 in Anfield ah nehnak an rak co.Culawng siloin Liverpool cun Premier league rori ah puai 6 sung rori anmai Innpi Anfield ah Chelsea neh thei loin an rak um.Asinan,tui season cu Liverpool an danglam zetih an hlan bangin cangsual an tum lo zet.Tui season hrang Premier league ah veikhat an rak do aw zo ih Stamford Bridge ah 1-1 in an rak duhtawk aw.

Inntek Liverpool hi Man United an duhtawk hnu ah puai 8 tiang rori a peh ih nehnak co thei team an si ih Chelsea cu Everton an neh lo hnu ah a peh ih puai 4 nehnak co thei ve an si.Chelsea hrang Hazard a lek tha ciamco ih tleirawl Odoi khal theihhngilh men ding a si lo.Cutilai in Livierpool hrang dungkham Van Dijk le Robertson an lek thatuk ih laitlan Keita khal a lek tha thok.

Player an nei tha veve ih Champion tum le top 4 um hnget tengteng tum a si ruangah an puai a pi dupdo dingih mit a tlaizet ding.

kick off cun Liverpool 2-0 Chelsea tiin a ruahdan a rel cia ih nangteh ziangtin ?