Watford Neh In Top 4 Ah Arsenal An Kaiso




Premier league round 33nak hrang Watford in Arsenal an rak mikhual ih an Kawlkil tisual mi ruangah 0-1 thawn mikhual Arsenal an neh lo.Watford dungkham in an kawlkil Foster Bawhlung a pe cu kawlkil in a sit zawngah Aubemayang in a rak kham man ih khawlsung ah Bawhlung a lut miarmo.

Arsenal XI (4-2-3-1) : Leno ,Monreal , Movropanos , Koscielny , Mustafi , Xhaka , Torreira , Iwobi , Ramsey , Mkhitaryan, Aubameyang.

Puai an thok cu Inntek in nasa zetin an nawr nan, an sit goal thei lo ih Arsenal in an nawr ve.Minute 10nak ah Watford dungkham cun an kawlkil Bawhlung a pe cu Kawlkil in Bawhlung a sit zawngah Arsenal hmaitlan Aubemayang in a rak khamsak man ih Bawhlung cu khawlsung ah a lut miarmo.Goal an suah hnu veten Inntek cun nasa zetih nor an tum cu an hmaitlan Deeney in Arsenal laitlan Toreira cu a kiu thawn a hngong ruangah red card in dawisuak cih a si.Inntek an malsawn zo nan,Arsenal in sit bet goal thei hrih loin colh an hmang.

Caan hrek neta sawn an thok cu mikhual in an nawr hmaisa nan, remcang tha an neihmi pawl hmang tangkai thei loin an um ih Inntek an tnag thei zet ve.Tawkfang cun mimal sawn Inntek in an nawrsal ih sit goal rori an tum ve.Cutin nasa zetin an nor aw ton rero nan,zohman sit goal aw thei loin an um ih 0-1 thawn caan a cem.

Hitin Arsenal cu puai 33 ah hmat 66 thawn table 4nak ah an kaiso.An hnuai ah puai 34 lek ih hmat 66 nei Chelsea le puai 33 lek ih hmat 64 nei Man United an um a si.