Valentine’s Day Suahkeh Dan




www.hdnicewallpapers.com

Valentine’s Day suahkehnak thuanthu hi Roman Emperor san kum zabi 3 nak kiangkap ah a si,cuih san lai ih Rome uktu hi Claudius II a si.Claudius in Rome kut hnuai ih ummi khua le ram hmuahhmuah cu Rome pathian lawnglawng be dingin thu a pek, a be lotu pohpoh cu thah ding ti a si.Asinan Jesuh Khrih a zum zettu le Khristian a sinak zahpi lotu, hremnak le thihnak lak khal ih pacangzet “puithiam Valentinus” cun Rome pathian a be duh lo,curuangah an kai, an hrem ih thawnginn sungah an khum.Cu tiih thawnginn sungih caan a hman lai ah thil danglamzet a thlengmi a um.Valentinus hi zirnak le thiamnak nei, mifim le thutheizet a si.Curuangah thawnginn kiltu (jailer) in a fanu Julia (suahkeh ihsin mit khua hmu thei lo) cu: țong,ca le theihnak phunphun zirter dingin Valentinus hnenah nitin a fehter ringring.Ca, țong, thiamnak le theihnak a rak zirh lawng si lo,Pathian thu khal nasaten a rak sim.Cutin Julia cun Pathian thu a ngai,a thei ih a thinlung a thamzet.Ni khat cu Pathian thu thawn pehpar in Julia in thu a sut ih Valentinus in theitawk in a sim.

Julia : “Pathian in kan thlacamnak a thei taktak maw?” 
Valentinus : “Thei tuk ee, in theihsak ringring a si”.
Julia : “Zingtinte ka mit khua ka hmuh theinak dingah Pathian hnenah thla ka cam ringring”.
Valentinus : “Na zum taktak ahcun Pathian hrangah zianghman a cangtheilo ti a um lo”.
Julia : “Oh, Ka zum, ka zum rori a si”.

Cutin an pahnih in hmun khatte ah lungrualzetin Pathian hnenah thlacamnak an nei.Cu tikah an umnak cu eng maksak (brilliant light) in a runkulh ih Julia cun, “Ka hmu thei, ka mit khua ka hmu thei zo” tin a au. Valentinus khal in, “A nung Pathian a hmin thang`hat si ko seh!”a ti.
Cutin caan zingmawzat an hman hnu ah Valentinus cu Rome lal Claudius in that ding in a thu a rel (ziangahtile Claudius in nupa neihawknak daan a kham,a raalkap lakah nupi nei zo pawl an cak lo tuk ruangah zohman nipi neih a siang lo,cumi cu Valentinus in a el.Pathian cun innsang nupa neihawk le faate neih ding hi a thupek le a duhmi a si a ti.Cuih hnu ah Rome pathian a biak duh lo ti ah Claudius cu Valentinus parah a thinheng tuk).Valentinus cu a thih ding zawngte ah Julia hnenah ca a kuat, Pathian thawih naite ih um sinsin dingin le Pathian rinsan sinsin dingin a sim, cuih a ca kuatmi a netnak ahcun “From your Valentine” tin a ngan.Cutin February 12,270 A.D ah gate hmai ah an that (cuih gate cu tuihsuun ni ah “Porta Valentini” tin amah theihhngilh lonak ah kawh a si).A thih hnu ah Julia in a thlaan kiangah thinkung pakhat “Almond tree” timi a phun(almond tree hi kan țong in relfiang ding a um lo).Almond thingkung hi “ Almond Tree” hi tuihsuun ni tiang: “Duhdawtnak, rualpi sinak le ngaihsak awknak” langtertu ah hman ringring a si.496 A.D ah Saint Pope Gelasius in February 14 hi kum tin “Valentine’s Day” a si ding tin a phuang ih kum ziangmawzat a rei hnu ah duhdawtnak thu cangan thiam (romantic authors)Geoffrey Chaucer le Shakespeare pawl in an cangan mi le cabu sung khal ah an rak ngan khum ve.

Leitlun Khristian hruaitu hmaisa pawl cun Jesuh ruangih nunnak a rak petu Valentinus hi a thih ni14 February ah theihhngilh lonak, sunlawihnak le upatnak an pe.San thuanthu a lai hrawng (Middle Ages) ahcun Europe ah an duhdawtmi fala-tlangval an hawl tikah February 14 ni ah a si țheu. Kum zabi 16 hrawng ihsin Valentine’s Day cibai buknak ca (greeting card) an rak hmang thok vivo ih kum zabi 18 hnu ahcun company pawl in tamzet an tuah ih kum zabi 20 hnu cun a phunphun a suak vivo.

HMINSIN: Valentine’s Day suahkehnak ngaingai hi Jesuh Khrih hrangih martyr tiang tuartu Valentinus ihsin a thok.A duhdawt zetmi thlaraulam ih a fanu Julia duhdawtnak hrangih a kuatmi Ca “From your Valentine” ihsin ra suakmi a si.Curuangah Valentine’s Day February 14 hi fala-tlangval ngai-aw pawl duhdawtnak thu simawk, ca kuatawk meen lawng a rak si lo.Pathian thu, taksa thu, sungkua thu, unau thu, rualpi thu ah: duhdawtmi taktak hnenah_duhdawtnak tilang hi a si!!!

SOURCE: Nun Zirhtu by Joel Lalcungmang!