TUISUN MIPI KHAWMLAI NAM IN DAWT

0
149

Indonesia ram Java tikulh ih Yogyakarta khawpi ah tuisun Sunday ih Christian pawl khawmnak biakinn pakhat sungah pa pakhat cu Nam thawn a lut ih mipi a buaiter ruangah Police cun kap in an kai.Tuisun February ni 11 khawmnak ih buainak tuahtu pa cun Pastor pa le Police bawi pakhat le midang pakhat cu Nam thawn a dawt.Hi Nam ih dawh tuartu pawl ih dinhmun hi theihfiang a si hrih lo.

Police cun nam kengtu pa ih pum cu meithal in an kap ih an kaih hnuah Sizungah tuamhlawm a si.Ziangruangah nam thawn mi khawmlai a dawt ticu theihfel a si hrih lo nan Misual pawlkom ih cangdan si ding cu a bang lo ti si.Himi hi khawm dingin mipi 100 hrawng cu biakinn ah an ra thleng ih cumi cu nam pi 3 hrawng ih sau in a rak dawh mi a si.

Biakinn ih kawhhran upa pakhat cun hipa in khawmthok hnu reilote ah biakinn sungah lut in buainak a tuah mi a si tiah a sim.”Mipi cu Biakinn sung ihsin thlaphang mangbang in an au ciamco.Keikhal ka nupi le fate sahimnak ruat in mipi lak ihsin ka tlansuahpi” tiah upa pakhat cun a sim.Biakinn sungih mipi cu tukverh ihsin an tlansuak khal cui nam kengtu cun a dawi vivo tlun ah Biakinn sung thilri khal tampi a siatsuah ti a si.

Hi nam keng ih buainak a suahnak Biakinn ah police cu an thleng lohli ih Nam kengtu cu a nam hlon ih kaih a duh lo ahcun kah a si ding thu police cun an sim.”Police cu meithal van lam ah hronak in an kap.Cupa cun Police hotu pa cu nam thawn a ra pan.Cule Police bawi cun a pum meithal in a rak kap” tiah kawhhran upa pakhat cun a sim.Hi namhar tuartu pawl cu an zaten Panti Rapih Hospital ah tuamhlawm an si tiah thuthang cun an tarlang.