Treble Champion Tum Solskjaer




Man United Coach Solskjaer cun a kaihhruainak hnuai ah Man United cu treble champion an si thei thu a rel ih thilcang thei lo tivek a um lo a ti.

Solskjaer hi 1999 kum ih Man United treble champion team ah a tel ve ih Champions league khalah Man United hrang nehnak goal a rak thun.Cuih nehnak goal a thunnak hmun cu Barcelona Bualrawnpi Camp Nou ah a si ih caan cem zikzawng ah 2-1 in Bayern Munich an rak neh.

Solskjaer cun ,”ka ruahdan ahcun ka kaihruainak hnuai ah Man United in treble kan champion thei timi ka zum.Asinan,Bawhlung leitlun hi a danglam cak tuk thlangih treble champion ding cu a harsa tuk thlang ding.Ziangahtile ,club pawl in sumpai nasa zetih an hman thlang tikah premier league ahtla cun top 6 luh thei hman a ol nawn lo.

“Premier league team tlunah Barcelona ,Real Madrid ,Bayern Munich ,Juventus le Atleitico Madrid tivek team tha zetzet pawl cu treble champion duh cun paltlang an tul ih a harsa zet ding.Asinan,thilcang thei lo tivek a um lo ih kan zuam ahcun a cangthei theh a si ,” a ti.

Tui season ahcun Man United in treble champion an beisei thei lo ih season thar khal hrang an dinhmun a fel hrih lo.Ziangahtile season thar ah Champions league an lek rori ding ti rel a theih hrih lo cu a si.