Steven Gerrard In Arsenal Ih Luh I Rak Khap Tiin Luis Suarez A Phuang Aw




Barcelona hmaitlan Luis Suarez cun Barcelona siloin Arsenal ih a rak luh hmaisa sawn zikte thu a relsuak ih Gerrard ruangah ka lut ngah lo a ti.

Liverpool cun 2011 kum ah hmaitlan Suarez cu £22.8m thawn Ajax ihsin an rak lei ih an hmaitlan rinsan zetmi a si.Asinan,2013 kum ah Liverpool an tlasia ih Champions league lek ban in premier league table 7nak ah an um.Champions league lek ban lo ding an si ruangah an hmaitlan thazet Suarez cu champions league lek ding Arsenal in thla hlawh tamzet thawn lei an rak tum ciamco.Suarez khal in Arsenal ih luh cu pawi tinak a rak nei lo ih luh rori a tum.Asinan,Captain Gerrard in a rak siang remrem lo ih Liverpool ah a umhrih phah.

Suarez cun,”Europe League hrang kan tling nerno nan, sezet in season kan khar.Cutikah Arsenal pan dingin ka um thlangih keimah khal in pan ka rak duh zet.Asinan,Captain Gerrard in Arsenal ih ka luh ding cu a siang remrem lo.’ kan hnenah caam hrih ko aw,Arsenal ahcun na tha nawn lo ding.Culen, season thar ahcun na duhduhnak ah na lut thei ding,Bayern Munich ,Barcelona ,lole Real Madrid ah siko’ in ti.

“Cuih tum cu ka thuhla ruangah Gerrard thawn kan biak awk netabik tum a si ding.Cutin,ka palai cu thu felfai ka bawhcah zo thu ka simthei ih Liverpool ah ka caam hrih phah a si,” a ti.

Gerrard ih rel vek bangin Suarez cun 2014 kumah Lilverpool a suahsan taktak ih Spain club tha Barcelona ah £64.98m thawn a rak lut a si.