Smalling In Sahrang Messi A Kaitho Silawm – Ferdinand




Champions league quarter final puai neta sawn hrang Man United in Barcelona an neh lo dan ah Man United dungkham hlun Ferdinand cun tuih Man United dungkham Smalling a mawhthluk zetih sahrang Messi a kaitho tiin a rel.

Ferdinand cun ,”Man United le Barcelona puai hmaisa sawn ih Smalling in a kut thawn Messi a rak vai ngah cu thil mawi lo zet a si tlunah sahrang Messi a ti harh phah rori siko.An puai neta sawn ah Messi in mawi zetin phuba a la ih til hum in Man United an mualpho.Mi tampi cun tuih Barcelona team hi a hlan ih Barcelona team bangin an tha nawn lo tiin an rel theu,Asinan Messi a umsung ahcun ziang team khal neh thei a si.

“Messi puai ka thlir thei cu Bawhlung puai ka zohmi pawl lak ihsin thabik pakhat a si.Zoh manhla ka tituk ih hivek ka rak hmu dah lo lawlaw.A thiamnak ruangah Messi cu a va ropi tete ve aw tiih rel men ding a si ko.Culawng siloin Bualrawn sungih Messi lek lai thlirtu pawl khal in ‘Messi zoh dingin Bualrawn sungah ka rak um ve,an ti thei” tiin a rel.

Ferdinand cun Barcleona le Man United puai hlanah Man United in nehnak an co a zum thu a rel nan,Messi parah tampi a thum aw ti ih rak rel zotu a si.