Serie A : Genoa vs Juventus ( Thlirnak )




Tuizan ,March ni 17,Myanmar 6 pm ah Serie A round 28nak hrang Genoa cun Juventus an rak mikhual dingih puai zohnuam zet a si ding. Tui dinhmun ah Juventus hi hmat 75 thawn Serie A hmaihruaitu an si ih sung puai an nei hrih lo.Cutilai in Genoa cu hmat 30 thawn table 15nak ih um an si ih league niamsawn tlak an tum lo zet.

Juvnetus hrang C.Ronaldo colh pek a si ih Matuidi le Chiellini khal cawl thutthi thei an si thu Coach Allegri in a rel.

Juventus coach Allegri cun ,”C.Ronaldo in colh hahdam a tul ih Genoa ah ka hruai lo ding.Matuidi le Chiellini khal cawl thei dinhmun ah an um.Zuamawknak ziangkim a sosang tuk thlangih team kan remthiam a tul tuk.Genoa thawn kan lek ding cu a harsa zet dingih hmaisa sawn kan innpi khalah hmat 1 te lawng kan rak hmu thei.Curuangah kan zuam nasat cu a tul ding a si,” a ti.

Genoa le Juventus hi Turin ah an rak lek zo ih 1-1 thawn an duhtawk aw.Tui tum hi Serie A puai hrang avei 2nak ding a si ih nehtu ding relcia a har.Puai 11 vial lek ding um thlangah Juventus in champion an duh cun nehnak an co a tul ih Genoa khal league niamsawn ih tla lo dingin an zuam nasat a tul ve.

Serie A puai dangah Milan Derby a um ih tuizan lole thaizing Myanmar 2am ah AC Milan le Inter Milan an do aw ding a si.