Real Madrid Captain Ramos Ih Duh Lomi Mourinho




Real Madrid in an Coach thar dingih Zidane an lakluh sal thu ah President hlun Calderon a tongsuak ih Real Madrid coach dingah Mourinho cu duhbik le lak luh tum hmaisa bikmi a sinan,Ramos ih duhlonak ruangah Zidane sawn an ruai sal tiin a rel.

Calderon cun ,”Real Madrid ih duh bikmi Coach cu Mourinho a si ih Mourinho khal Mardid pan a man zet zo.President Perez in Mourinho a uar zetih Real Madrid coach thar dingah lak luh tengteng a tum.Asinan,colhbuk hruaitu Ramos in Mourinho cu Real Madrid coach dingah a duh lo lawlaw ih nasa zetin Perez a dokalh.

“Buainak nasa zet kan nei lai ih,buai hmang Coach kan lak lala cun buainak dang thawn kan buai sinsin ding.Curuangah coach thar ding ahcun Mourinho a cang lo rori a si tiin Ramos a tang.Cutin,Perez cu a thinlung a thlengsal ih Zidane sawn Real Madrid coach thar dingah a lalut sal a si,” a ti.

Calderon cun rel phah in ,”Mourinho hi coach thazet a singai,laksawng khal tamzet a cawi zo ih coach ropi zet pakhat a si.Asinan.colhbuk ah mi kaihruai a thiam lo zetih player thawn buai a hmang fawn,Perez in a thinlung athleng phah rori a si ding ,” a ti.