Puai Rorum Zetah 4-4 Thawn Villarrea Le Barcelona An Duhtawk Aw




Laliga round 30nak ah Villarreal in hmaihruaitu Barcelona an rak mikhual ih 4-4 thawn an duhtawk aw.Puai a rorum zetih Inntek lam in 4-2 thawn hmai an hruai zo nan,caan cem zik zawngih Messi le Suarez sit goal mi thawn 4-4 in an duhtawk aw.

Barcelona XI ( 4-3-3) : Stegen, Alba, Lenglet,Umtiti,Roberto , Arthur, Busquets,Vidal ,Coutinho,Suaerz,Malcom.Thelhbawh : Messi ,Rakitic ,Alena,Pena, Semedo ,Pique,Boateng.

FT: Villarreal 4-4 Barcelona ( Villa – Samuel 23, ekambi 50, Iborra 62,Bacca 80, Barca : Coutinho 12′,Malcom 16′,Messi 90′, Suaerz 90+ )

Puai an thok ih mikhual Barcelona in an nawr hmaisa bangin Coutinho bawhlung pekmi thawn Suarez in khawlsut thazet a nei nan,Villarreal kawlkil in a rak kham thei.Inntek in an nawr ve ih corner thawn lusawh thazet an neihmi cu Barca kawlkil Stegen in an khamsak.Mikhual hrang Umtiti a tisual cu Inntek in remcang thazet an nei nan,khawl an sutmi thazet cu Barca Kawlkil Stegen in a khamsak sal.Barcelona in bawhlung cotam sawn in an nawr ih minute 12nak ah goal an thun.Roberto cun Malcom hrang bawhlung tha zetin a tuahsak ih Malcom cun bawhlung a tlanpi zurzo,kawlkiang a thlenzawng ah tha zetin a sit phei ih Courtinho in Barca hrang a rak sit goal.Barcelona in an nawr peh ih minute 16nak ah Vidal ih tuahsakmi thawn Malcom in a sawh goal.Minute 18nak ah Suarez pekmi thawn Coutinho in remcang thazet a neih ih kawlkil vial a um thlang,Bawhlung a phir tioto ih kawlkil khal in a kai man lo nan,khawlban a ngah.Barca hrang nai zetin Umtiti in khawl a thelh hnu ah Inntek in an nawr ve ih minute 22nak ah goal an thun.Samuel in bawhlung thazet a dong cu Inntek hrang khawl a sutih khawlban a ngah,bawhlung rakir sal cu Alba in a tifel thei lo tikah Samuel cun Inntek hrang a sit goal.Inntek in an nawr peh ih remcang thazet an nei nan,sit goal thei loin an um.Duhtawk aw zetin an nawr aw nan,goal dang lut bet hrih loin colh an hmang.

Caan hrek neta sawn an thok cu Barcelona in bawhlung cotam sawn in an nawr nan,Inntek in goal an thun sawn.Minute 50nak ah Inntek in an nawr thutthi cu vorhlam ving ihsin Ekambi in bawhlung a tlanpi,khawlkiang a thleng cu midang hrang a tuahsak dingah ruat in Barca kawlkil Stegen a rak suak man,Cutin a sit goal zekzi sawn.Barca in bawhlung cotam sawn in sit goal an tum nan,Inntek in goal an thun bet sawn.Minute 62nak ah Morianes in Barca dungkham pawl kham man lo dingin bawhlung thazet a tuah ih Iborra in inntek hrang a sit goal.Nasa zetin Barcelona an thleng aw ih Captain Messi khal a lut.Suarez in nai zetin khawl a thleh hnu ah Inntek an tihnung um sawn hrih ih khawlban an ngah hnu ah remcang thazet khal an hlah.Barcelona in sit goal tumtuk ih an nawr cu Inntek in an nawr thuthi ih minute 80nak ah Carzola bawhlung tuahmi thazet thawn Bacca in Inntek hrang a sit goal bet.Puai a sosang sinsin ih mikhual hrang Alena,Roberto le Messi pawl yellow card an ngah hnu ah inntek dungkham Gonzalez khal Suarez a titluk manah yellow card vei 2 thawn dawisuah a si.Barcelona in an nawr peh ih minute 90nak ah Captain Messi cu titluk siin penalty rin kaingte ah mikhual in free kick an ngah.Free kick cu Captain Messi in mawi zetin a sit goal zurzo.Barcelona in nasa zetin an nawr ih minute 93nak ah corner an ngah,Captain Messi ih corner sitmi cu Inntek dungkham in a rak sawh hnu ah Suarez in naa zetin Barcelona hrang a sit goal ih caan a cem cih.

Yellow card vei 11 rori porh a si ih mikhual in vei 7 ngah in Inntek in vei 4 an ngah ve.Hitin Barcelona in puai 30 lek zomi Laliga ah hmat 70 thawn hmai an hruai hrih ih nehnak co Atletico Madrid in hmat 62 thawn an daih deuhdeuh a si.