Premier League & Laliga Aiin Serie A, A Harsa Sawn – C.Ronaldo




Premier league le Laliga ih rak lek rero zo Juventus hmaitlan C.Ronaldo cun Premier league le Laliga aiin Serie A, ih lek harsa a tisawn thu a rel.

C.Ronaldo hi Premier league club Man United ihsin lar ciamco thok a si ih Man United thawn Champions league 1 ,Premier League 3,FA Cup 1 ,League cup 2,Community Shield Cup le FIFA Club World Cup 1 pawl a rak cawi zo.Kum 5 sung Man United hrang a lek hnu ah Spain Laliga club Real Madrid ah a thawn ih 2009 ihsin 2018 tiang a lek.Real Madrid ah Champions league 4,Laliga 2,Copa del rey 2,Spain super cup 2,UEFA super 2 le FIFA club World cup 3 pawl a cawi thei.Kum 9 sung rori Real Madrid hrang a lek rero hnu ah 2018 June thla ah Italy club Juventus ah a thawn ih Juventus hrang a lek rero lai.

C.Ronaldo cun ,”Keimai bulpak nun ahcun buainak zianghman ka nei lo ih nuam ka tizet.Ka ruahdan ahcun Italy ahhin tuahthat awk rero phah ka tul in ka thei ih league harsa zet a si.Ahleice in hmaitlan pawl hrangah tla cun league harsa ngaingai a si.Serie A hi hivek in a tha ding tiin ka ruat ban lo lawlaw.Bulpak nun ahcun nuam ka tizet ih ka hlimzet tlunah ka sungte pawl khal nuam an ti theh.

“Portugal le Spain khal ka ngai lo zet.Rualpi thatha,club thatha le in duhdawt zettu tamzet tlansan in hmundang ah ka feh nan,ngainak ka nei lo ih hitawk khalah keimah duhtawk zettu le ngaihsak zettu tampi an um ve.

“Serie A hi Laliga aiin a harsa tiin ka ruat,Ziangahtile Laliga ahcun sit goal kan tum cio ih puai a ong zet.Serie A ahcun a si ve lo,thazet ih khawl an kilhim hnu ah sit goal an tumsawn.England khalah kum 5 sung ka rak lek zo nan ,Sirie A tlukih sit goal harnak league ka tong hrih lo a si,” a ti.

C.Ronaldo hi a club thar Juventus hrangah puai 36 a lek zo ih goal 24 a thun thei zo.Serie A vial ah puai 26 a lek zo ih goal 19 a thun zo a si.