Premier League Hmaihruaitu Thar Man City




Premier league round 32nak hrekkhat pawl cu kar laklawh ah lek a si ih City khal in an mikhual Cardiff city cu 2-0 thawn rak neh in Premier league hmai an hruai fel.

Man City XI ( 4-3-3 ) : Ederson ,Danilo ,Stones,Laporte ,Zinchenko ,De Bruyne, Fernandinho,Foden, Mahrez,Jesus,Sane. Thelhbawh :Walker,Muric,Kompany,Gundogan ,Sterlling,B.Silva,D.Silva.

Puai thok veten City in nasa zetin an nawr hngal ih minute 6nak ah Laporte Bawhlung tuahsakmi thawn damtua De Bruyne in Man City hrang a sit goal. City in nasa zetin an nawr ih De Bruyne ,Mahrez le Jesus pawl ih khawlsutmi thazet cu Cardiff kawlkil in a rak khamsak theh.Colhzik zawngah City hrang Jesus ih bawhlung pekmi thawn Sane in a sit goal ih 2-0 thawn colh an hmang.

Caan hrek neta sawn khalah City in nasa zetin an nawr ih De Bruyne ,Foden le Sane pawl in remcang thazet an neihmi pawl hmang tangkai thei loin an um.Foden in khawlban a ngah ih Jesus khal in De Bruyne hnen ihsin bawhlung thazet a donmi cu sit goal thei loin a um.Mikhual in remcang thatuk veikhat an ngah ve nan,kawlkil vial um zo ah Niasse in a sit goal lo.Cutin goal dang a lut nawn lo ih 2-0 thawn City in nehnak an co.

Hitin City cu premier league ah puai 32 lek fel zo in hmat hmat 80 thawn hmai an hruai ih Liverpool in puai 32 ah hmat 79 thawn an thlun nerno a si.