Player Tampi An Suak Ding – Zidane




Real Madrid coach Zidane cun thaal caan ah Real Madrid player tamzet an suah ding thu a rel ih nasa zetin team tuahthat an tum.Real Madrid hi season 3 peh rori ih champions league champion thei an sinan,tui season cu an cangse zetih tilhum in season an khar zik.

Curuangah an coach hlun Zidane an kokir sal zo ih thaal caan ah nasa zetin mithar lei an tum.Real Madrid ih lei tum hleice mipawl cu Chelsea hmaitlan Hazard ,Man United Pogba le Tottenham laitlan Eriksen pawl an si.

Zidane cun ,”Season thar hrang nasa zetih timtuahnak kan nei dingih player tam zet an suak ding.Tuah zopawl an suak ding timi rel caan a si hrih lo ih season cem veten player suak ding pawl kan simthei ding a si,” a ti.

Zidane ih tongkam vek asile Kroos rori khal season thar hrang a dinhmun a hnget lo ih suak thei dinhmun ah a um.Laitlan Llorente khal loan thawn a suahter zum a si ih Bale ,Lucas ,Asensio ,Isco le Vallejo pawl khal dinhmun hnget lo ah an um theh a si.