PINGKHUNGKYI BOARDER SAYAKYI IN TLAWNGTA KUM 13 MI SUALPI

0
197

Kalay peng, Pinkhungkyi khua Model Class boarder neitu Saya Thawng (kum 43) in a tlawngta kum (13) nute cu February ni (10) zaan ah a pawngsual tiah theih a si.

Thu umdan cu February ni (10) zaan nazi (8) hrawngah phun 7 kai lai Mai…. le a rualpi pahnih cu zaan ca zoh an theh hnu inn an tlun lai ah an sayakyi pa in bike thawn a rak dawi ih ‘bike parah ra kai uh, nan inn ah ka lo thlah hai ding’ tiah a ti hai. Sinan an duh lo ih cutik ah an saya pa cun Mai…. cu hranhram in a bike parah a to ter ih an inn lam ih thlah dingah a phur. A rualpi pahnih cun inn ih an thlen hnu ah an saya pa in Mai…. a phurh thu an nulepa an sim ih Mai…. ih umnak a pu le an va sim sawng. An saya pa cun Mai…. cu an inn hmai a thlen zawngah na piin bike a mawng ih Pyi Taw Tha khua lam ah a fehpi vivo. Mai….. ih sungkhat pawl in thil umdan an ringhlel ruangah bike thawn an va hawl nan lamzin ah an pial aw ih an va hmu lo. Cumi sungah ah an sayapa in cun Mai…. cu an inn ah a thum. A pu le in Mai…. cu thil umdan an sut tikah an sayapa in a pawngsual thu, a pawngsual theh in paisa thawng khat a pek thu pawl a sim hai. Mai…. ih sungkhat pawl cun a zaanzaan in Letpanchaung palik an phone ih pawngsualtu cu kaih ter an tum. Sinan mipa lam in ngaithiam an dil ruangah February ni (11) sun ah ting (100) in an relrem aw. Cawhkuannak paisa khal thla khat sung ih pe aw dingah an lungkim. Mai….. ih nu hi Singapore ah a hlawhaw ih a pa khal Tuluk ram ah fu sat in a hlawh aw ve ih February ni 13 tiang Mai….. parih thilcangmi hi a nulepa in an thei hrih lo. A pawngsualtu Saya Thawng hi February ni (11) zaan lam in Pinkhungkyi khua ah an hmu nawn lo. Amah hi nupi fate nei zo a si ih a fapa upa bik hman in nupi a nei zo.

Hi thu ah hmin ngan lang duh lo Mai…. ih pate cun “Tlawng khal a suak cih, inn leng hman a suak ngam nawn lo” tiah a ti.

Tangka thawn an relremnak san cu kum kim lo pawngsualtu pawl cu thihdan tiang a pek thei ruangah anmah sawn mi that ih an can pang ding an duh lo ruangah le pu le lam in sungkhat naivai an si ruangah a si thu a sim bet. Sinan Malaysia ih um Mai…. pai’ nau cun rak ngaidam lo ding in thu in cah ta tin Mai… ih pate in a ti.

Kum kim lo pawngsual relremawk thu thawn pehpar in Sih-ni No Hmung in “pukmah (376) vek in thih hlan lo thawng thlak lole kum (10) sung thawng thlak a theih. Kum kim lo hi cu relrem awk a theih lo. An relrem awk a si hman ah hi thu a theitu pohpoh in zu a thum theih. Khrihfa daan ah sual ngaidam hi a mawi zet. Sinan cozah daan tuahmi cu pahbal lo sehla a tha. Culole daan timi um tla a tul lo ding. Sual kan relrem vivo a sile paisa nei le awkam thiam pawl in an duhduhmi an tuah thei pei cu” tiah a sim.

Tihrim thil ahcun ngaidam aw lo in tipang thil lawngah ngaidam aw sawn sehla taih Kalay hrambun zatlang pawlkom ih cangvaitu pakhat in a hmuhdan a sim.

“Hivek cu sumpai in lai a rel cat vivo ah a cang. Nunau in hmailam ah a hmaikhua ti siatnak ih ting (100) in an lungkim mi kha neta ih thu a ruat sal thei tikah a diriam ngaingai kei maw. A taksa a piangsual ta ding si khawh. Laidan cu a si ko. Sinan daan cu daan vek in feh ko seh, neta hrang lesson ngahnak ah tla a cang ding” tiah Kalay hrambun zatlang pawlkom ih cangvaitu pakhat in a sim.

Ref:Zalen Thuthang (C/P)