Ozil Mikhual India Lemcang Thiam Shah Ruhk Khan




India zuknung cangthiam lar zet Shah Ruhk Khan cu Arsenal laitlan Ozil ih mikhual siin Rmirates Bualrawnpi ah a tlawng.Shah Ruhk Khan cun tui kar nikhat zan ih Arsenal le Newcastle puai cu a hmun rori ah a thlir ve ih khuallian tonak ah Ozil mikhual siin a to.

Himi puai ah Ozil khal lehnak hmun a co ve ih Arsenal cun 2-0 thawn Newcastle an neh.Puai theh hnu ah Ozil le Shah Ruhk Khan an kawm aw ih Arsenal laitlan Shah Ruhk Khan uar zettu Xhkaka khal a tel ve.

Shah Ruhk Khan le Ozil hi Muslim biaknak tlun veve an si bangin an theihawk a rei zet zo ih an biaknak khalah nasa zetih pum pe aw veve an si.Ozil tlunah Xhaka a lungawi hiamhiam ih Shah Ruhk Khan a ton ruangih a lungawizia cu hitin a tarlang.

Xhaka cun ,”Lemcang thiam ka duh zetmi pakhat hmuh le ton thei cu ka hrang sunloihnak ropi pakhat rori a si,” a ti.

Shah Ruhk Khan le Ozil hi rualpi tha an si nan,Shah Ruhk Khan in Arsenal a tan ciamco lemlo ih Premier league ahcun Man United a tan.Man United a tan thu ah hitin a rak tongsuak zo hngehnge.

Shah Ruhk Khan cun,”Ka fapa hi bawhlung sit thiam si dingin ka duh ih Man United hrang lek thei sehla ka beisei.Culawng siloin Man United hrang no.10 hruhtu rori dingah ka duh a si,” a ti.

Makzet cu Shah Ruhk Khan in a fapa hrang Man United a duhzia a rellang nan,Old Trafford ah veikhat hman a feh hrih lo ih Man United korte thawn a zukmi khal hmuh ding a um hrih lo cu a si.