Owen In Tui Season Champions League Ih Champion A Zum Mi A Rel Ve




Liverpool le Man United hmaitlan hlun Owen cun tui season champions league ih champion a zum mi a rel ve ih premier league club pawl caan a si rori ding a ti.

Owen hi bawhlung sit colhsan zotu a si bangin BT sport ah bawhlung thurel in a um ve ih a zumhmang rel theutu a si.Dik caan a neih theu bangin dik lo caan khal a nei ve.Tui tum champions league zuamawknak khalah Liverpool lole Man City an champion a zum thu hitin a rel.

Owen cun “Tui season thok ihsin tui kum Champions league zuamawknak cu English team pawl caan a si rori ding tiin ka rak relcia zo.Cuvek in tuah team 4 rori in Champions league quarter final an lut ih ka diriam lawlaw.Himi premier league team 4 lak ihsin team khatkhat an champion ka zum ih Liverpool lole Man City ka zumbik.Tuhrih ahcun Tottenham le Man United aiin Liverpool le Man City hi an thasawn deuh in ka hmu a si,” a ti.

Tui season champions league zuamawknak khal a sosang deuhdeuh ih quarter final dinhmun an thleng zo.Quarter final ah Tottenham vs Man City ,Liverpool vs Porto ,Ajax vs Juventus le Man United vs Barcelona pawl an do aw ding a si.