OLYMPICS AH KIM JONG UN FARNU TELVE

0
112

S.Korea ram Pyeongchang khawpi ih tuahmi Winter Olympics Onnak puaiah S.Korea President Moon Jae-in le American VP Mike Pence le N.Korea palai pawl hotu Kim Jong Nam pawl in an telpi.Hi puainak ah N.Korea lam ihsin ratu pawl cu Media lam in ngaihsak cuang in an kildeuh ti si.N.Korea ihsin ra teltu lakah Kim Jong Un ih farnu Kim Yo Jong khal a telve ti si.

1950-53 Korea ramsung ralpi a suah hnu N.Korea uktu innsang ihsin tuhi a veikhat S.korea thlennak a si.Hi Ramsung buainak cu tutiang khalah remnak le lungkim tlangnak tuah in hmin an kar thei hrih lo nan N.Korea hotu rori ih farnu S.Korea a rave cun mipi thinlung a danglamter nasa.Kum 30 hrawng mi Kim Yo Jong cu a upa Kim Yong Un thawn remawzet ih um an si ih N.Korea tlangsuak khalah nikum ihsin hriltlin mi a si.

Media tampi cun Kim Yo Jong cu Trump fanu Ivanka Trump thawn an tahthim theu mi a si.Ani hi N.Korea ih Policy thehdarhtu hotu khal a si.Kim Jong Un khual a tlawn tinten a thuhla thehdarh dingin hi a farnu in a thlun ringring.American in hremnak an pek mi hmin cazin ih teltu pakhat a sive.Kim Jong Un in hiti a farnu S.Korea a fehter nak cu an ram 2 karlak pehtlainak that sinsin a duh ruangah a si tiah Media lam cun an zumnak an sim.

Cun Kim Yo Jong cun a U Kim Jong UN ih thucah pawl khal a kengtel a si.Mi tampi cun N.Korea ih cangvaih dan tha an tizet laiah Ramhnih kom ding duh lotu pawl cun hi puainak Bualrawn lenglam ah duhphorhnak an tuah rero.Tuitum Pyeongchang puai hi Olympics hmuahhmuah lakah a daibik ih ruah a si ih lektu 3000 lenglo cun lehnak phun 15 ah an zuam aw ding.

Sak le thlang Korea lektu pawl cu hmunkhat te ah Bualrawn sungah an ra lut.N.Korea Nuclear ruangih buainak cu a tlakniam thei ding hi lektu pawl ih saduhthah a si.Tuitum ah N.Korea lam ihsin lektu mi 22 le palai 400 cu Olympics puai an ra hmang a si.