Mourinho Ih Duhthusam Champions League Quarter Final Draw




Man United Coach hlun Mourinho cun tuitum Champions league quarter final draw ding hrang duhthusam a rak nei ve ih a rura in a turu lawlaw.

Mourinho hi Man United an dawisuak hnu ah bawhlung coach hna a tuan hrih lo nan,BeIn Sport in bawhlung thureltu hna a tuan bangin bawhlung thuhla thawn a ciah aw ringring.Tuitum champions league quarter final draw ding khalah Mourinho cun duhthusam a rak nei ve ih hitin rel.

“Ka duhdan ahcun Premier league club pawl hi quarter final ah tong aw thluh hai sehla ka duh.Cutin team 2 in semi final an kai ngah tengteng ding.Man United vs Man City tile Tottenham vs Liverpool tiin tong aw hai sehla puai rorum zet a si hrimhrim ding.

“Hmundang ah Ajax le Porto tong aw sehla ka tizet.Ziangahtile group dinhmun ihsin an lek thazet veve ih an pahnih an ton awk tikah team 1 cun semi final a lut thei ding.Culawng siloin an lek tha ih semi final an luh thei cun Netherland mipi le Portugal mipi hrang lungawiza a si ding.

“Cangthei sehla Barcelona le Juventus cu semi final lole final ih do awk ter ka duh,ziangahtile club thazet pahnih le player picang zet pahnih doawknak ding cu a rorum in a picang tuk ding.Curuangah annih pahnih cu quarter final hrang ka ui deuh ih sangsawn hrang ka beisei zet a si” a ti.