Messi Parah Thum Aw In Kan Rinsan Ko – Valverde




Barcelona cu Captain Messi parah an thum aw tuk ih Messi rori an rinsan timi thu ah Coach Valverde a tongsuak ih Messi parah kan thum aw ko ,thiambik a si ruangah a si tiin a rel.

Laliga round 30nak hrang Barcelona cu Villarreal do dingin khualkhua ah an feh ih nehnak co thei loin 4-4 thawn an duhtawk aw.Barcelona hrang Captain Messi cu thelhbawh ah toter a si ih Coutinho le Malcom sit goal mi thawn hmai an hruai hmaisa.Asinan,Inntek Villarreal in goal 4 rori a peh in an thun ih 4-2 thawn hmai an hruai ve thung.Cutikah Barcelona coach Valverde a thinphang thokih minute 61nak ah Coutinho laksuak in Captain Messi a lekter.Minute 90nak ah Captain Messi cun free kick thawn goal mawizet a thun ih minute 93nak ah Messi corner sitmi cu Suarez in a rak sit goal.Cutin,duai dingih ruah zomi Barcelona cu Messi ruangah hmat 1 an hmu theisal.

Curuangah Messi tel lo cun Barcelona cu an lek tha thei lo,Messi rori an hngauhsan tiin mipi thawmvang a tam ih Valverde khal hitin a tongsuak phah.

Valverde cun ,”Kan pha lo rori ih ,Messi cu kan hngauhsan in a parah kan thum aw ko,ziangahtile leitlun ih thiambik a si ruangah a si.

“Messi tel lo caan ah kan fimkhur sinsin thiam a tul ih caan hrek hmaisa sawn kan lek dan bangin kan lek a tul.Caan hrek hmaisa sawn ahcun Messi a luh lo bangin Messi parih thumawknak a um lo ih,kan lek tha tuk tlunah nehnak cotlak kan si.

“Tui kan tonmi ih fiangzet pakhat cu laliga zuamawknak a fel hrih lo tinak a si.Inntek Villarreal khal an lek tha lawlaw ih nasa zetin in tibuai thei.Tampi zir ding kan neih bangin thansoh kan pan a tul,ziangahtile puai a hnok deuhdeuh ding a si ,” a ti.

Barcelona cun tuikar zarhpi zan ah Laliga round 31nak hrang table pahnihnak ih um Atletico Madrid an mikhual dingih hmaikar ni 3 zan ah Champions league quarter final hrang Man United do dingin Manchester khawpi an pan ding a si.