Messi In Ka Record Thaisiat Ding A Phutuk – Casillas




Real Madrid Captain hlun Casillas cun Laliga ih a record ropi siatsuahtu ding ah Real Madrid player rori a duh thu a rel nan,a record thaisiattu dingah Messi khal a phutuk rori tiin a rel.

Casillas hi Laliga tuanthu ah bulpak in nehnak co tambik hminsin rak tuahtu a si ih puai 334 nehnak a co thei.Himi a record cu Barcelona captain leo Messi in a man fel zo ih record thar tuah dingin a dinhmun a thatuk.Cutikah Casillas cun a record siatsuahtu ding ah Real Madrid player a duh thu a rel nan,Messi khal in a phutuk rori a ti.

Casillas cun ,”Laliga thuanthu ih record ropi ka tuahmi thaisiat ding ahcun Real Madrid player rori si thei sehla ka duh zet.Asinan,Messi khal in a phutuk ih thilmak tamzet a rak tuah rero zomi khal theihpi tlakzet a si.Culawng siloin ka record cu mi pakhat khat in an thaisiat leh rori ding tikhal ka thei cia tuk a si,” a ti.

Casilla hi Real Madrid kutsuak a si bangin 1999 ihsin 2015 kum tiang Real Madrid hrang kawlkiltu a si.Asinan,Mourinho thawn an rem awk lo ruangah a thanliannak club Real Madrid a rak suahsan ih 2015 kum ah Portugal club Porto ah a rak lut a si.