Messi Do Ding Cu Ka Duh Zetmi A Si – Smalling




Man United dungkham Smalling cun Champions league quarter final hrang Barcelona hmaitlan Leo Messi do ding cu a duh zetmi a si thu a rel.

Man United le Barcelona hi tui season champions league quarter final hrang do aw ding an si ih April ni 11,nili zing Myanmar 1:30 an ag Man United Innpi Oldtraford ih sit hmaisa ding an si.

Smalling cun ,”Messi kham ding cu ka duh zetmi thil a si.Tui season cu ka vantha lawlaw,ziangahtile C.Ronaldo le Mbappe khal ka rak kham zo ihnuam ka ti lawlaw.Culawng siloin Man United player ka si thei khal ka uang aw zet.Curuangah ra rero uh.

“Champions league lek ban dingin kan rak zuam nasa ih tui season khalah top 3 si thei kan tum.Hmailam pan ih kekar ding caan kan nei ih Bualrawn sungah ziang kan tuahthei timi cu kan pholang duh zetmi a si,” a ti.

Man United in tui season ah Mbappe ,C.Ronaldo le Hazard pawl an rak do zo ngai Smalling in a rak kham tuito zo.PSG le Juventus cu anmai innpi ah an neh lo nan,khualkhua ah an neh thei veve ih Chelsea khal FA cup ihsin an rak dawisuak lohli a si.