March Thla Hrang Premier League Player Lek Thabik Ah Mane




Liverpool hmaitlan Mane cu March thla hrang Premier league player thabik hril a si ih Apu Klopp khal March thla hrang Coach thabik ah hril a rak si zo.

Tui season ah Mane hi Liverpool hrang a lek tha zetih puai Liverpool hrang premier league puai 31 ah goal 17 thun thei in Champions league khalah goal 3 a nei.March thlasung ah Liverpool hrang goal 3 a thun ih puai 4 ah vei 3 nehnak le veikhat duhtawk hminsin an nei.

Mane cun March thla hrang Premier league player thabik laksawng ngah dingin Liverpool ih a rualpi Robertson ,Leicester hmaitlan Vardy,Man City laitlan Bernardo Silva,Everton dungkham Coleman tlunah Southampton laitlan Prowse pawl a lan theh.

Mane in premier league thla khat hrang player thabik laksawng cu 2017 kum ah a rak ngah dah ih huti Liverpool thawn a ngah hmaisabiknak a si.Liverpool player lakah dungkham Van Dijk in premier league thla tin hrang player thabik laksawng cu 2018,December thla ah a rak ngah ve zo a si.