Liverpool Hrang Hminsin Thar Tuahtu Salah




Premier league round 33nak ih Liverpool hrang nehnak goal thuntu hmaisa Salah cun club hrang thuanthu tharte a ngan.

Premier league round 33nak hrang puai hmaisabik ah Southampton le Liverpool an do aw ciamco ih minute 75 tiangah 1-1 in an duhtawk aw .Caan a tam nawn lo thawn an duhtawk awk lanta zum a sinan,Minute 80nak ah Liverpool hrang hmaitlan Salah a cangvai ih amahten bawhlung tlanpi lurlo in Liverpool nehnak goal a thun.A hnu ah Firmino tuahsakmi thawn Captain Henderson in Liverpool hrang a sit goal betih 1-3 thawn khualkhua Liverpool in nehnak an co.

Hitin Liverpool cun puai khat lek tam sawn si cingin premier league table hmai an hrui ih Champion dingin an dinhmun a thazet.

Liverpool hrang nehnak goal thuntu Salah cun Premier league ah Liverpool hrang goal 50 a thunkim thei ih Liverpool club thuanthu ah goal 50 thunthei dingih puai lek malbik hminsin thar a tuah.

Salah cun Liverpool hrang premier league goal 50 thun dingin puai 69 te lawng a lek ih Fowler ,Suarez le Torres pawl hnak in hminsin a nei thasawn.Fowler cun Liverpool hrang premier league goal 50 thun dingin puai 88 a lek ih Suarez in puai 86 le Torres in puai 72 a lek ve a si.