Leo Messi Kan Tih Lo – Simeone




Atletico Madrid coach Simeone cun tuizan ih an do dingmi Barcelona team ih lek Captain Messi an tih lo thu a rel nan,a upat zet thu khal a rel.

Tuizan ah Laliga round 31nak hrang Barcelona in Atletico Madrid an rak mikhual dingih puai zohnuam zet le sosang zet dingih ruah a si.Atletico madrid in Laliga champion an tumlai asile Barcelona an neh hmaisa a tul dingih ,Cutin an karlak hmat thlauawknak a mal sinsin ding.

Simeone cun ,”Messi thuhla in sut a si ahcun ka lo sim ding ,kan tih lo lawlaw siko,Asinan kan upat zet thung.Tui dinhmun Barcelona kan thlir asile mangbang ding khop in an feh tluang tuk ih zuamawknak pathum rori ah an dam theh lai.A liamcia season ah Champions league la thei loin Rome ah an rak cangsual nan,tui season ahcun treble champion si an tumzet.

“Coach Velverde in a naule a kaihruai thatuk ih dinhmun thazet ah an um thei.An dinhmun vek ih um ve ding cu thil harsa tuk rori a si.Kan neh ah si maw neh lo ah si maw kan buai lemlo ih thansoh sinsin ding cu kan tumbik mi a si.Ziang a si khalle Barcelona in Laliga champion cuh theitu team ih in ruah ruangah kan lungawi ngaingai a si,” a ti.