Leo Messi In Casillas Ih Record A Tawmpi




Barcelona hmaitlan Leo Messi cun 2-0 thawn Espanyol an neh zanah Real Madrid kawlkil hlun Casillas ih Laliga record rak tuahmi nehnak co tambik sinak cu a tawmpi thei.

Laliga round 29nak hrang Barcelona le Espanyol cu Camp Nou ah an do aw ciamco ih Barcelona in neh zetin an lehpi nan,sit goal thei loin an um.Asinan Barcelona hrang Captain Leo Messi a cangvai ih minute 71nak ah le minute 89nak ah Barcelona hrang nehnak goal a thun.

Hitin Messi cu Laliga thuanthu ah puai 334 rori nehnak a co thlangih Laliga thuanthu ah nehnak co tambik sinak cu Real Madrid Captain hlun Casillas thawn an tawm aw.Hiti a si ruangah Messi cun Laliga thuanthu ih nehnak co tambik record tuah dingin puai 1 vial nehnak a co bet a tul thlangih tui season sung rori ah record thar a tuah hngal zum a si.

Puai 29 lek zomi Laliga cu puai 38 tiang lek ding a si bangin puai 9 vial lek ding an nei thlangih Cumi sungah Barcelona khal puai khat tal cu nehnak an co zum a si.

Messi cun Barcelona thuanthu ih puai lek tambik hminsin tuahtu Xavi ih hminsin puai 676 khal a dawi rero ih puai 675 lek zo in Barcelona thuanthu ah lek tambik pahnihnak a si.

Culawng siloin Messi cu tui season zuamawknak tinkim ih goal 40 a thunkim thlang ruangah season 10 sung rori goal 40 tlun a thun thei ringring a si.

2009/10 – 47 goals
2010/11 – 53 goals
2011/12 – 73 goals
2012/13 – 60 goals
2013/14 – 41 goals
2014/15 – 58 goals
2015/16 – 41 goals
2016/17 – 54 goals
2017/18 – 45 goals
2018/19 – 40 goals