Leitlun Huap Boxing Zuamawknak Ih Tel Ban Chinpa Pu Run Nawn Ih Thuanthu ( Zoramthanga )




1985 ihsin 1990 kum tiang India le Mizoram ih larzet mithong thiam Zoramthanga cu Chinpa Salai Run Nawn a si ih leitlun huap boxing zuamawknak khalah India aiawh in a rak tel rero thei.Boxing paihzet mi pakhat hrangah Myanmar ih hmunkhuar ding cu hlawhtlin a har ding timi ruahnak thawn Mizoram ah a rak feh ih India aiawh tiangin mi a thong phah thei a si.

a lar hlan

Pu Run Nawn cu 1963 kumah Selawn khua, Falam peng, Chin state, Myanmar ah a suak. An sungten Tahan-Kalaymyo kiangih Zotlang/Minhlah (hlanih Tithim) khua ah an vai. Pu Run Nawn cu Myanmar Army kawpin boxing thawng a rak thawk. Asinan Kawl ralkap lakih boxing thawng cu hmailam hrang ruahsannak a mal deuh tiih a ruah ruangah Mizoram ah a feh ih Mizo-hmin Zoramthanga tin hmin a pe aw, cutin 1985 ihsin boxing thawng a thawk sal. Cule Mizoram-Myanmar Champhai Border Championships ah sui tacik (gold medal) a rak ngah ih cui kumah best boxer khal a ngah cih.

Pu Run Nawn (Zoramthanga) cu Mizoram le India ram pumpi aiawh in vei tampi boxing a rak thong. 1989 ah tla Moscow (Russia) ih tuahmi World Amateur Boxing Championships ah a tel ih quarter finals tiang a thleng, quarter final ah Rogelio Marcelo (Cuban rammi) hnenah a rak sung.

A hlawhtlinnak bik cu 1990, Mumbai ih tuahmi leitlun pumpi zuamawknak, 6th Boxing World Cup ah a siih “light flyweight” 108 pounds (49 kilograms) ihsin leitlunpi lakah dar tacik (bronze medal) tiang rak ngah theitu a si. Cuih ṭumah South Korea mi Jin Yang timipa cu points in a rak neh. Cutin quarter finals a thlengih quarterfinals ah Scotland mi Paul Weir khal points thawn a neh lala. Netabik cu Semi-finals ah United States ih Eric Griffin (champion) hnenah points thawn a rak sung. A pathumnak (dar tacik) hrangah Boxing World Cup in zuamawknak a tuah salih a India pi, Dhamendar Yadav cu points 17-4 rorin a neh ih cutin leitlun pumpi zuamawknak Boxing World Cup rori ah a pathumnak (dar tacik) tiang a rak ngah thei. Pu Run Nawn (Zoramthanga) ih ngahmi dar tacik hi India rampi khalin Asian Games tlunlam, “International boxing tournament” ih tacik a rak ngah hmaisabikmi khal a si.

1990, World Cup Boxing ih dar tacik a ngah hnu, Aizawl khawpi ih a ra tlun tikah Mizoram pumpi in mi maktara le miropi, Pu Run Nawn (Zoramthanga) cu upatnak le sunloihnak thawn an rak hmuak.Pu Run Nawn cu Mizoram cozah in an state ih Sports Officer ah an hmang. Boxing thong cu 1992 ihsin a cawl. 9 February 2005 ah Mizoram ih Lunglei Civil Hospital ah thisen sang (hypertension) nat in a nun a liam. A hnaṭuan Sports Officer cu a thih hlan tiang a ṭuan. A nupi le a fale pathum a tanta.

Pu Run Nawn (Zoramthanga) ih hlawhtlinnak ruangah Mizoram ih mino tampi in boxing thong an run paih phah. Kan Chin (Falam-mi) sungin leitlunpi zuamawknak tiangih hlawhtlinnak rak ngah theitu kan neih hi kan thazang a tlung ngaingai. Chin mino tampi khal kan mah le lamzin cio ah Pu Run Nawn (Zoramthanga) vekin leitlunpi ih hlawhtlinnak ngah theitu kan sinak dingah zuamnak le teimaknak thawn hmainawr sin uhsi. ( Ngantu – Ting Hlei Thang )