Kum Note Ih Virgin Hloh Nunau Pawl In Pasal Then An Olsam




Daily mail ih zohdik dan vek asile ,Kum note ih virgin hloh Nunau pawl in pasal then an olsam phah ti a si. Kum ,15, 16 ih virgin nawn lo Nunau zatek ah 31% in pasal an neih hnu kum 5 ah pasal an then theu ti a si ih zatek ah 47% in kum 10 hnu ah pasal an then tlangpi tikhal cu an zingzoinak ihsin an hmuhsuak mi pakhat a si.

An zohfel dan cu nuthlawi le Pasal nei lai mpum 3,793 hrawng hnen ihsin thusuh fiang le an umdan zohfel a si.Kum ziat an si ah nupa sinak an hmang thok,ziangtin virgin an rak hloh tile ziangruangah an then aw tipawl tiangin thusuh an si.Himi ih an hmuhsuah mi pakhat cu kum kim lo ,tleirawl lai ih pasal nei pawl cun pasal then an harsat lo ti a si. Kum 14,15 le 16 hrawngih virgin hloh pawl cun zatek ah 31% in pasal an then tlangpi ih kum 17 tlunih virgin hloh pawl cun zatek ah 15% lawngin pasal an thensal theu ti a si.

Himi ih an hmuhsuak betmi cu nauhak zetih virgin an hloh ruangah zianghman pawisaknak an nei nawn lo ih an zawngsang duhzet.Cutin ,an pasal vial khop nawn loin pasal thawn an then aw phah khal an tamzet.

Thilfiang zet pakhat cu nauhak zet lai ih virgin hloh le thenawknak hi tampi pehtaihawknak a nei ti a si.

Himi ah virgin an hlohdan khal in tampi lai a rel ve.Mai duh ruangih virgin hloh hrangah remthat awk a har zet ti a si ih sualpi ruangih virgin hloh pawl cu remtha aw thei an um ve phah.

Innsang din dingah kum in lai a rel tuk lo nan, tleirawl lai ih nupa sinak hmannak in innsang nun a ti tluang thei lo.Thianghlimnak le zahumnak humhim hi thil hmuahhmuah lakih sunglawi bik khal a si.

Zohfelnak ih a hmuhsuah mi cu kum kim lo ih virgin hloh pawl in pasal then an olsam zetih pasal khal an nei kual rero men ti a si.Tulai ah virgin an um nawn lo tivek ruahnak nei hrimhrim hlah,virgin a tawr in an tawr liailiai lai.Virgin lo pawl in an relmawi awknak ah virgin taktak an um nawn lo an timen.Thudik cu thianghlim zetzet le mai thinlung neh theizet minung an tampi.

Bible sungah Fala thianghlim timi a tam zetih nuthlawi tivek hmuh ding a malzet.Pathian in mi pakhat hrang lawngah a lo sersiam ih na taksa cu mi pakhat hrang lawng ding a si.