Khualkhua Ah Juventus Neh In Ajax In Champions League Semi Final An Lut




Champions league quarter final puai neta sawn hrang Juventus in Ajax an rak mikhual ih anmai Innpi ah 1-2 thawn an sungih Champions league an mangtha.

Juventus XI (4-3-3 ): Szczesny; De Sciglio, Rugani, Bonucci, Alex Sandro; Emre Can, Pjanic, Matuidi; Bernardeschi, Ronaldo, Dybala.

Ajax XI(4-2-3-1) : Onana; Mazraoui, De Ligt, Veltman, Blind; Schöne, Frenkie De Jong, Van de Beek; Neres, Ziyech, Tadic.

Puai an thok cu Inntek in Bawhlung cotam sawn in an nawr hmaisa sawn nan,remcang tha tuah aw thei loin an um.Tawkfang cun mikhual in a nawr ve nan,mikhual team khal remcang tha tuah aw thei loin an um ve.Mikhual an phursawn thlangih minute 20nak ah remcang thazet an nei nan, khawl tlunah an sit.Duhtawk aw zetin an nawr aw ton thlangih minute 27nak ah Inntek in corner an ngah.Pjanic ih Corner sitmi cu zam thazet C.Ronaldo in Inntek hrang a rak sawh goal ih Juventus in goal an nei.Goal an suah hnu in mikhual in sit goal ve tum in a nawr ih minute 34nak ah goal an thun ve.Ziyech ih khawlsutmi cu Beek in Bawhlung rak kaitang in mikhual hrang a sit goal ve.Juventus lam in off side tiin an dokalh nan,VAR zoh a si hnu ah goal ih pom thotho a si.Nasa zetin an nawr aw ton nan,goal dang lut hrih loin colh an hmang.

Caan hrek neta an thok cu Inntek sawn in Bawhlung cotam in an nawr hmaisa.Inntek in nawr zet cingin remcang tha an tuah aw thei lo ih mikhual sawn tih an nung zet.Mikhual team in thazet ih khawl an sutmi cu Juventus kawlkil in vei 2 rori a rak khamsak.Mikhual sawn in nasa zetin an nawr peh ih Ziyech ih khawlsutmi thazet cu Juventus kawlkil in a rak khamsak hrih.Inntek an cangvai thei lo ih mikhual sawn in nasa zetin an nawr.Minute 67nak ah mikhual hrang Schone ih corner sitmi cu Captain De Ligt in a rak sawh goal.Inntek in an nawr phah thlang nan, remcang tha an tuah aw thei loin an um.Minute 71nak ah mikhual hrang Ziyech ih a sit goal nan,VAR zoh a si hnu ah Off side tiin pom lo a si.Inntek in nasa zetin an nawr ve ih Blind in penalty kulhsung ah a kut in Bawhlung a dai ngah nan,referee in ball hand tiin penalty a pe lo.Cutin goal dang lut nawn lo in 1-2 thawn khualkhua ah Ajax in nehnak an co ih caan a cem.

Hitin komkhawm ah 2-3 thawn Ajax in nehnak an co ih Champions league semi final an lut fel a si.