Ka Vanthat Sit Goal Mi An Si – Leo Messi




Barcelona Captain Leo Messi cun Champions league quarter final puai neta sawn hrang Man United lamih goal 2 a thunmi cu a vanthat ruangih sit goal fang a si tiin a rel aw.

Champions league quarter final puai neta sawn hrang Barcelona in Man United an rak mikhual ih 3-0 in an rak sop.Barcelona hrang Messi in goal 2 a thun ih Coutinho in goal 1 a thun ve.Komkhawm ah 4-0 in Barcelona in Man United an neh ih Champions league semi final an lut fel.

Messi cun minute 16nak ah Young ih Bawhlung colai mi a cuhsak in Fred a bum hnu ah Bawhlung a tlanpi ih penalty kulh leng ihsin Barcelona hrang a sit goal.Minute 20nak khalah Jones tlansan in a vorhlam te thawn penalty kulh leng ihsin a sit goal sal.A goal neta sawn cu a vorhlam ke ih a sit tlunah a sit fuh lo zetih De Gea tisual ruangih goal a si ti a theih.Asinan,a goal hmaisatu cu goal ropi zet pakhat a si.

Messi cun ,”Puai ropi zet a si ih Barcelona diktak kan hmu.Caan hrek hmaisa sawn minute 5 hrawng kha cu nasa zetin kan buai ih kan caang thei lo.Ziangruangah timi kan thei lo nan, tawkfang cun thazet in kan lek lohli theisal.

“Ka goal hmaisatu kha vanthat ruangah a si ih goal neta sawntu khal vanthat sinsin ruangah a si.Asinan,a thupibik mi cu quarter final paltlang ih semi final kan lut thei cu a si ih kum reizet semi final lut thei loin kan rak um zo.

“Kalkhat hnu kalkhat feh in ke kan kar vivo dingih kan tumram thleng dingin kan zuam ding.Laliga kan nei lai ih cawl hahdam thei hngal kan si hrih lo,” a ti.

Barcelona hi champions league semi final an luh fel zo bangin Laliga hmaihruaitu le Copa del rey final lek ding an si ih treble champion an beisei ringring thei lai a si.