Ka Duhdan Vek Rori In Barca Innpi Ah Kan Lek Neta Ding – Man United Coach Solskjaer




Tui season champions league quarter final ih Barcelona an ton thu ah Man United Coach Solskjaer cu a hnuailam bangin a tongsuak.Mi tampi cun Man United le Barcelona an ton awk tikah Man United tla cia vek in an rel nan,Solskjaer cun Barcelona dawisuak ih Champions league semi final luh a tumsawn.

Solskjaer cun “Team picang ka neh thei zia cu ka rak pholang rero zo bangin thilmak thleng thei vivo khal a si.Bikhiah nei lo ih kekar kan tum bangin player pawl khal hlawhtlun duh tiatia in an um.Tui season hi tluangzet ih ke kan kar thei ding thu rualpi pawl in in sim cece ih keikhal ka phur zet.Kum 20 liam zo ah Barcelona thawn nehnak ka rak co zo ih no.20 ka rak hruh.Nou Camp ih Barcelona kan neh cu ropi ka tituk ih zum ban lo thil rori a si.Barcelona Bualrawn pi Nou Camp hi leitlun huap bualrawn ropi zet a si bangin tui tum khalah kan va tlawngsal ding cu a si.

“Ka duhdan rori in Barcelona innpi ah kan lek neta sawn ding cu ka hrang thil thatuk a si.Mai innpi ih lek hmaisa ding ka si bangin kan innpi ah result duhum zet kan hmuh asile khualkhua khalah nehnak co dingin ka fehsuak ding siko.Barcelona thawn kan ton awk ruangah zianghman riahsiatnak kan nei lo ih semi lut tengteng dingin kan zuam sawn ding.Ziangahtile Champions league laksawng pi cawi na duh cun ziang team khal neh thluh a tul rori a si,” a ti.

1991 European Cup zuamawknak ah Man United cun 2-1 thawn Khualkhua ah Barcelona an rak neh dah ih Solskjaer khal a rak lek ban ve a si.