Juventus Ralrinnak Petu Ajax Laitlan De Jong




Ajax laitan De Jong cun Champions league quarter final ih an do dingmi Juventus cu tihnak a neih lo thu a rel ih semi final lut ding khal in caan thazet kan nei ve tiin ralrinnak a pe.

De Jong hi Barcelona ih lei fel zo mi a si ih Ajax hrang tui season cem tiang lawng a lek ding.Season cem veten a club thar Barcelona ah a lut dingih laliga lam ah a taal ve thlang ding.Ajax cun Champions league sungsuak dinhmun ah champion lai Real Madrid an rak dawisuak ih quarter final ah Italy club tha Juventus an do ding.

Juventus an do ding thu ah laitlan De Jong cun semi final lut dingin caan thazet an neih thu a rel ih Juventus cu Ajax an ton ruangah lungawi hiahhiah ih um men lo dingin ralrinnak a pe.

De Jong cun ,”Tui season champions league zuamawknak ah Juventus hi do harsa zet pawl an si ding tiin ruahnak ka nei.Atletico Madrid thawn an puai khal ka rak thlir ve ih an lek tha ngaingai.An tang thei zetih player tha tamzet nei an si.

“Tui season champions league zuamawknak khalah Juvenus hi champion zum zetmi an si ko ding,Asinan Real Madrid khal champion zum zetmi an si nan, kan rak dawisuak men.Ka rel duhmi cu Juventus lawnglawng rinsan a theih lo ih kannih khal semi final lut dingin caan thazet kan nei ve tiin ka ruat.

“Champions league quarter final hrang Ajax in do ding cu Juventus hrang lungawinak le phur hiahhiahnak tla a si men ding,Asinan Champions league ih kan lehnak pawl an zoh tik ahcun in nautat ngam lamlam lo ding a si,” a ti.