Juventus Nehtu Ajax Hrang Hminsin Ropi




Champions league quarter final puai neta sawn ih Juventus nehtu Ajax cun Champions league thuanthu ah hminsin ropi zet an tuah ih qualify vei 3 lek cingih Champions league semi final lut thei umsun team an si.

A liamcia season ah Ajax hi Netherlands league ih table 2nak an si.Table 1nak lawngin Champions league a lek thei hngal ih table 2nak ih um Ajax cun qualify puai 3 an lek hnu ah nehnak an co theh ih champions league group hrang an rak tling.Qualify puai hrang Stum Graz an neh hmaisabik ih Standard Liege le Dynamo Kiev an neh cih.Group ah Bayern Munich ,Benfica le AEK pawl thawn an umtlang ih table 2nak in sungsuak an rak lut.

Sungsuak ah Champion lai Real Madrid an dawisuak ih quarter final ah Juventus an dawisuak hrih.Himi khal thuanthu pakhat a tling ve ih season khat sung Champions league zuamawknak ah Real Madrid le Juventus team 2 dawisuak theitu umsun an si hrih.

Ajax hi Champions league ah mithar an si lo ih Champion laksawng rak la rero zotu le treble champion thei team khal an si.Tui season khalah treble an beisei lai ih Netherland league ah hmaihruaitu le cup ah final lut zo an si.