Juventus Nauhak Hrang Cristiano Jr A Turu Buru




C.Ronaldo cun a team Juventus cu Champions league semi final ah a luhpi thei lo nan,a fapa Jr cu Juventus nauhak team hrang a lek thazet ih puai khat ah goal 7 rori a thun thei.

Juventus nauhak team pawl cu C.Ronaldo ih suahnak khua Madeira ah an tlawngih cup cuhawknak an nei.Zuamawknak ahcun Juventus nauhak team in 25-0 in Maritimo China an neh hmaisa ih Jr in goal 7 a thun.An puai neta ah 15-1 in Camacha an neh betih Jr in goal 5 a thun thei.

Zuamawknak ahcun Jr in puai 2 vial a lek lai nan,goal 12 rori a thun zo ih a sit goal mi hrekkhat cu kawlkil tiang ih bum thluhmi an si.Culawng siloin goal 7 a thun tum tla cu caan hrek hmaisa sawn vial ih a sit goal mi hlir an si.

Tuih an lek rero mi cu International Centenary Maritime Cup ti a si ih zarhte ni ah an theh ding.Jr cu Juventus U-9 hrang lek a si ih a pa bangin no.7 a hruh.

C.Ronaldo cun a fapa thuhla ah ,”Jr hi a zuam nasa ih ka nauhak lai vek rori a si.Keimah bangin sun a duh lo lawlaw ih nehnak co dingin a theitawk a zuam ringring.A duhmi ziangkim tuah dingin zalennak ka pe ih Bawhlung sit zirh cu nuam ka tituk a si,” a ti.