Juventus Hnemtu Leo Messi




Barcelona Captain Leo Messi cun Champions league quarter final ih Ajax neh lotu Juventus a hnem ih an thilton cu tuar harzet ding le amah khal in a rak tuar zo thu a rel.

Champions league quarter final puai neta sawn ah Barcelona cun Man United neh in semi final an lut nan,Juventus cu Ajax neh loin champions league an suahsan.Man United thawn an puai theh ah Messi cu Juventus thuhla suh a si ih hitin a sawn.

Leo Messi cun ,”Ka lo sim ding ,Juventus hi team thazet an si ih Champions league an suahsan cu an hrang tuar a harsa zet ding.Kannih khal nasa zetin kan rak tuar zo ih Khualkhua ah Roma neh loin Champions league kan rak mangtha zo.Champions league ahcun ziangvek puai khal nehnak co a harsa zet thlangih ziang team khal do an harsa theh a si,” a ti.

Nehnak an co thu ah Messi cun ,” Nehnak kan co thei ruangah ka lungawi zetih hmailam pan in ke kan kar vivo ding.Tucun laliga kan ruah a tul thlangih a rangthei bik in kan champion lohli a tul.Champions league semi final hrang khal nasa zetin timtuahnak kan nei ding a si,” a ti.