ISREAL IN SYRIA VANZAM IN KAP

0
215

Isreal Jet Fighter pawl cun Syria khawpi Damascus khawpi kiangkap ih syria ralkap hmun hrekkhat cu an kah ciamco thu Syria Media cun an tarlang.Syria ralkap lam cun hi Isreal ih kah mi Rocket pawl cu rocket khamnak in an rak kham thei theh thu thuhla thannak an nei ih thuhla cipciar cu zianghman an phuangtel lo.Syria thuhla ngaihventu pawl cun Syria ih ral hriamhrei retnak hmunpi cu Rocket in a ngah a si tiah an sim.

Isreal Jet ih a kahnak hmun ahcun Science lam thiamnak lam thilri a um ih Syria ralkap in Chemical ralthuam an tuah a si tiah ni tlaknak ram pawlin an ruahnak hmun kha a si.Isreal cun 2011 ihsin Syria ram sungah vanzam ih kahnak vei 100 lenglo an tuahzo thu an phuang.Tuih Syria lam in Isreal in a kah thu an phuan mi ah Isreal lam ihsin zianghman thuhla phuannak an nei lo.Isreal in Syria ram sung vei tampi a va tibuainak san cu Lebanon ram ih hebolla misual pawlhnenih ralthuam tha taktak a pek mi khampit duhnak ruangah a si.

Iran ram ih somdawl mi Hebolla pawl cu 2006 ah Isreal thawn an kap aw ciamco zo.Hi Hebolla pawl cun ramsung buainak neitu Syria ih Bashar al-Assad cu bawm dingin an ralkap a thawngtel in an thlah ti a si.Isreal Jet Fighter pawl cu Lebanon vanlam ihsin Damascus khawpi kiangih Ralkap hmunpi cu February ni 7 zanlam ah an va kap rori a si tiah Syria ralkap ih thu thannak ah hmuh a si.