Huesca Le Barcelona An Duhtawk Aw




Laliga round 32nak hrang Huesca in table hmaihruaitu Barcelona an rak mikhual ih goal um loin an duhtawk aw.

Barcelona hrang Captain Leo Messi ,Suarez ,Buquets ,Roberto le Rakitic pawl an cawl theh ih tleirawl tamzet an lut.

Barcelona XI ( 3-5-2) : stegen ,Umtiti ,Murillo ,Todibo ,Malcom ,Puig, Vial ,Alena ,Wague ,Dembele ,Boateng. Thelhbawh : Alba,Coutinho ,Arthur,Cillessen,Semedo,Lenglet,Ruiz.

Puai an thok ih Inntek Huesca in nasa zetin Barcelona an nawr ciamco nan sit goal thei loin an um ih Barcelona in Bawhlung cotam sawn in an nawr sal.Minute 17nak ah puai ti danglam thei dingin Dembele in remcang thatuk a nei nan,kawlkil vial umnak ah a sit goal lo.Barcelona in an nawr peh bangin dungkham Murillo in remcang thazet a nei nan,a sawh goal ve lo.Inntek in nawr caan an nei ve theu nan,remcang tha tuah aw thei loin an um ih goal lut hrih loin colh an hmang.

Caan hrek neta sawn an thok ih Barcelona in Bawhlung cotam sawn in an nawr nan,remcang tha tuah aw thei loin an um.Minute 52nak ah Inntek in an nawr ve cu remcang thazet an nei ih an kawlsutmi thatuk cu Stegen in a ke thawn a rak khamsuak ngah.Barcelona in an nawrsal ih Dembele in caantha a neihmi cu hmang tangkai thei loin a um.Minute 57nak ah Malcom in kehlam sir ihsin Bawhlung a luhpi ih kawl a sut zukzi cu Huesca kawlkil in a kai man lo nan,khawlban a ngah.Nasa zetin mikual an thleng aw ih Coutinho ,Arthur le Alba pawl an lut nan,sit goal thei cuang loin an um.Inntek an tihnung um thei lo ih mikhual khal in an sit goal thei cuang bangin goal um lo cun caan a cem.

Hitin Barcelona cu laliga ah puai 32 lek zo in hmat 74 thawn table hmaihruaitu an si hrih ih table 2nak Atletico Madrid in nehnak an co a si khalle hmat 9 thlau in Laliga hmai an hruai thotho ding a si.