Hmat 1 Lawngih Duhtawk Real Madrid




Real Madrid khal Zidane an kokir sal zo nan, an dinhmun a tha taktak thei hrih lo ih Laliga round 32nak khalah Leganes thawn 1-1 in an duhtawk aw.

Real Madrid XI (4-3-3 ) : Navas ,Marcelo ,Nancho ,Varane ,Carvajal,Valverde ,Casemiro ,Modric ,Isco ,Benzema ,Asensio. Thelhbawh : Bale ,Lucas, Llorente ,Ceballos , Odriozola , Vallejo.

Puai an thok ih mikhual sawn in an nawr hngal bangin minute 8nak ah Asensio in remcang thamangkheng a nei nan,sit goal thei loin a um.Minute 15nak ah Inntek in remcang thazet an nei ve nan,an sit goal ve.Remcang tha tuah aw thei loin reizet an lek ih minute 45nak ah Real Madrid hrang Marcelo ih Bawhlung tuahmi cu Valverde in khawl a rak sut nan,Inntek kawlkil in olsamten a rak khaisak,Inntek in an nawr ve cu Silva in a sit goal ih colh an hmang cih.

Caan hrek neta sawn an thok ih mikhual in an nawrsawn sal.Minute 51nak ah Modric tuahsakmi thawn hmaitlan Benzema in khawl a sutih kawlkil in a rak bengsuak nan,Benzema thotho in a rak sit goal.An duhtawk aw hnu cun nasa zetin tan an suah veve nan,sit goal aw thei loin an um ih 1-1 in caan a cem.

Hitin Real Madrid cu puai 32 lek zomi laliga ah hmat 61 thawn table 3nak an si ih an tlunah Atleico madrid puai 32 ah hmat 65 le Barcelona puai 32 ah hmat 74 an umlai a si.