HLUTDAW IN ROHINGYA THU AN RELTA

0
121

Kawlram sungih ramhrin miphun sungah Rohingya timi miphun an um lo thu Leitlun ramtin ih an theihtheinak dingah February 5 ih tuah mi pituhhlutdaw Meeting pi cun an rel.Rohingya tiih an kawh laiah Leitlun ih hmuhnak ih a fiang theinak dingah Rampi in ziangvek in nan tuah tiih Shanram Metman pengpi MP U Tin Aye thusuh mi a si.

Rakhine ramkulh ih Rohingya Bangali pawl thuhla hi a thupi in thate tawlrel a tul.A rei vivo cun kaphnih karlak ah buainak a suak vivo thei tiah a sim mi a si.Hi Rakhine thuhla ah Leitlun pi ih nornak cu zianghman ih siar lo a ngah loih thupi pa tuk ih ruah khal a tul lo.Cangsual olte thil a si ruangah daithlan men khal a ngah lo tiah a simbet.

Hi thusuhnak cu Union Minister U Thein Swe cun,”Kawlram mi pum siarnak Independent hlan ah 1911,1921 le 1931 ah an rak siar.Cun 1953-54 ah hrinhnam siarnak le 1973 le 1983 mipum siarnak ah Rohingya timi hmuh a rak si lo tiah a sim.Rampi hruaitu pawl cun thu an sim tikah Rohingya timi tongfang an hman lo men si loin Leitlun ramdang pawl an hman mi hman duh loin an soisel.Biaknak lam Vuanci zung cun Rohingya cu Ramhrin miphun ah an tello timi Cabu an ngan rero lai ih 90% an theh zo ih 2020 ah suah thei an tum thu Thura U Aung Ko cun a sim.