Free Kick A Sit Dan Relsuaktu Leo Messi




Tulai bawhlung leitlun ih free kick sit goal thei zet Barcelona captain leo Messi cun free kick a sit goal theidan cu hitin a relsuak.

Leo Messi hi 2014 kum hnu in free kick sit ah a thangso deuhdeuh ih season tinten free kick thawn a sit goal ringring thei.A liamcia season ah free kick thawn goal 7 a thun thei ih tui season vialah free kick thawn goal 7 a thun kim zo.laliga ah puai 3 peh rori in free kick thawn a sit goal thei ih free kick ah a hmin a thatha sinsin.

Laliga round 30nak ih Villarreal thawn an puai khalah free kick thawn goal mawizet a thun ih free kick a sit goal dan cu hitin a rel.

Messi cun ,”Porhawknak ah sihlah sehla,free kick ka sit caan ah khamtu pawl tlunih sit cu ka uar zetmi a si.Asinan, a caancaan ahcun khamtu pawl tlun lawnglawng ka sit duh lo ih an khamlonak hmun ol ah ka sit theu.Cutin,kawlkil pawl in ka sitnak hmunbik an theithei lo ih an buai phah.Free kick ka sit zik zawng tiang kawlkil buai zetih ret ding cu ka tummi a si,” a ti.

Messi ih free kick hminsin cipciar an zohdan ah hmaisa season 10 sungah goal 19 lawng a thun thei ih season neta vei 4 ahcun goal 27 rori a thun thei a si.