FLORIDA TLAWNG MEITHAL KAHNAK IN 17 THI

0
109

American ram Florida State ih Parkland phunhra tlawng ah meithal kahnak ruangah a malbik mi 17 an thi tiah Police lam cun an sim.Meithal kaptu hi kum(19) mi Nicolas Crus a si ih amah hi Stoneman Doulas High School tlawng ihsin an rak dawisuak zo mi tlawngta pakhat a si.Nicolas Cruz cun Rifle thazet hmangin Tlawnginn Campus a luh hlan ihsin mi a kap thok ih cunah mi 3 an thizo.

Tlawnginn Campus sung a lut ih mi a kapsal lala ih 12 an thi tiah Broward Police cun an sim.A dang mi pahnih cu Sizung an thlen hnuah an thisal. Meithal kahnak a suah hnu nazi 2 ah Cruz cu kaihngah a si.A hlan deuh ah hi kahnak ruangih hriamhma ngah khal midang an um thotho ti thuhla a um ih a kaptu hi kaihngah a si lo ruangah meithal kahnak hmun ah zohman feh lo dingin mipi hnenah theihternak an rak tuah.Helicopter par ihsin an zuk mi Video vek a sile hriamhma ngahtu hrekkhat cu Tlawnginn lenglam ah an tuamhlawm rero hmuh a si.

Tlawnginn sunglam ah meithal kaptu cu a umlai tivek ih ca ngantu khal an um thotho.Meithal kaptu cu Tlawnginn ih Bizu sungah a relh a si titu khal an um lala fawn.President Trump cun hriamhma tuartu pawl le mithi innsang hrangah a riahsiat pinak a phuangcih ih American ram sungih Tlawngta pawl le Saya pawl thlaphan um dinhmun ah timi hrimhrim um ding a si lo tiah a twitter ah a tarlang.