Europe League Ah Ka Lo Champion Pi Ding Ti ih AC Milan Rak Tiamtu C.Ronaldo




Juventus hmaitlan C.Ronaldo cun Juventus a luh hlanah AC Milan cu Europe league ih a champion pi theitu ding thu a rak tiam ih an hnenih luh dingin a rak tumzet.Asinan,AC Milan cu midang kutih a luh ruangah C.Ronaldo thuhla khal a cangsuak lo tiin Mirabelli in a rel.

Massimiliano Mirabelli hi AC milan director rak tuan ringring zotu a si ih AC Milan in neitu thar a neih veten Milan a rak suahsan hngal ve.Milan a suahsan ding zawngih thilthleng cu mipi hnenah simfiangnak a nei ih mipi mak ti a hlawhzet.Ziangahtile Real Madrid hmaitlan C.Ronaldo thawn nasa zetin an rak be aw.

Massimiliano Mirabelli cun ,”AC Milan neitu sinak nei lai sehla,tuah C.Ronaldo cu AC Milan hrang a lek rero ding.Real Madrid a suahsan hlanah nasa zetin ka be aw ih hitin in rak simthei,”Champions league zuamawknak ah nan tel ban lo nan,a pawi lo.Europe league ah ka champion dah lo ih ka lo champion pi ding a si,’ in rak ti.

“Kan hnenih ra lut dingin a phur zet ih a palai thawn khal in ka be aw rero zo.Asinan,AC Milan ih ka caan a cem tikah ziangkim a tawp theh ih a C.Ronaldo khal AC Milan hrang a lek lo phah a si,” a ti.

Massimiliano Mirabelli hi AC Milan director rak tuan rero zotu a si tlunah AC milan neitu sinak mallai nei vetu khal a rak si.