Comeback Hmaisa In Beiseinak Thar In Pe – Solskjaer




Man United Coach Solskjaer cun PSG thawn an puai tum ih an comeback miin beiseinak thar a pek thu a rel ih Barcelona thawn an puai khalah comeback a tumzet.

Man United le Barcelona hi champions league quarter final hrang veikhat an rak do aw zo ih 0-1 thawn Barcelona in nehnak an rak co.Thaizing Myanmar 1:30am ah an do aw sal dingih goal nei tamsawn lole khualkhua goal nei tamsawn in semi final an lut ding.

Champions league sungsuak tumah Man United cun 0-2 thawn anmai Innpi ah PSG an rak neh lo hmaisa nan,PSG innpi ah 1-3 thawn nehnak an cokir sal ih Champions league quarter final an lut thei phah.Cuvek comeback ruangah Man United Coach Solskjaer khal nasa zetin beiseinak a neih.

Solskjaer cun ,”PSG thawn kan puai tum ih thilthleng in player le hruaitu pawl nasa zetin in bawm tengteng dingih ziangkim a danglam thei lai timi cu kan zumhnget tuk.Barcelona Innpi Camp Nou cu a danglam tikhal kan thei,Asinan player thinlung ah comeback timi a caam ringring lai.

“Remcang thazet zet kan tuah thei ding cu a thupi tuk ih sit goal tu ding hmaitlan kan neih that ding khal thil thupi zet a si.Curuangah remcang tha kan tuah tengteng a tul ih kan hman tangkai ding khal a thupi.Barcelona hi team thazet le player thazet nei an si tikhal kan thei keukeu nan,kannih khal team thazet PSG vek do ih comeback thei kan sizia kan rak pholang zo.

“Thuanthu kan zoh a si khalle kum 10 sunglai rori Barcelona ih thatzia kan hmu thei,Curuangah a harsa zet ding ,Asinan,kan tithei timi cu kan rak langter rero zo ve.Bawhlung ahcun ziangkim a thleng thei ih minute 90 sung caan kan neih lai bangin khawl kan kilhim thei asile ,dinhmun sangsawn ah kan um thei.Kan patum ih kan sangsawn nan,thiamnak a thupi sawn ih kan sit goal rori ding khal a thupi tuk a si,” a ti.

Solskjaer cun PSG thawn an comeback aiin Barcelona thawn an puai ih comeback cu a ropi sawn ding tikhal in mipi a rak simthei zo.

Solskjaer cun ,”PSG innpi ih kan cangvaihnak in nasa zetin phurnak in pe ih Barcelona khal khualkhua ah kan neh thei timi zumnak kan nei.Kan domi cu tui season champions league ih champion zummi le team thazet an si tikhal kan thei,Asinan kan ngam thotho.

“Barcelona hi anmai innpi ih sung dah lo an si ruangah nehnak kan va co a si ahcun kan hrang a sunglawi tuk dingih a ropi tuk ding,Anmai innpi ah an sung dah lo nan, kan va neh thei tuk.

“Sit goal tu dingah Lukaku ,Rashford le Martial pawl kan nei ih Bawhlung kan pek that ding lawng a thupi a si,” a ti.