Champions League Sungsuak Puai Neta Sawn Ih Lek Thabik Ah C.Ronaldo




Juventus hmaitlan C.Ronaldo cu Leo Messi,Mane le Sane pawl lan in Champions league sungsuak puai neta sawn ih lek thabik ah hril a si.Champions League sungsuak puai neta sawn ah C.Ronaldo cun a team hrang goal 3 a thun ih a team Juventus cu quarter final ah a luhpi.

Dinhmun se zetih um Juventus cun Champions league sungsuak puai neta sawn hrang goal 2 phur cia in Atletico Madrid an rak mikhual ih quarter final an luh duh cun goal suah thiang lo, 3-0 thawn nehnak an co a tul.

Juventus cun an tumram an theifiang zetih puai thok veten nasa zetin an nawr hngal.Minute 27nak le minute 48nak ah C.Ronaldo cun lusawh a thiamzia pholang in Juventus hrang goal 2 a thun ih minute 86nak ah penalty thawn goal 1 dang thunbet.Puai cem ah 3-0 thawn Juventus in nehnak an co ih komkhawm ah 3-2 thawn champions league quarter final an lut.Quarter final ah Netherlands club Ajax thawn an do aw dingih a hmaisa sawn hrang April ni 11,myanmar 1:30 am ah an do aw ding.

C.Ronaldo hi champions league zuamawknak ah a lek tha theizet ih puai 160 lek zo in goal 124 a thun thei.Champions league thuanthu ih sit goal tambik a si ih tui season khalah goal 4 a nei zo a si.