Champions league: Liverpool vs Porto ( Thlirnak )




April ni 10,nihnih zan lole nithum zing Myanmar 1:30 am ah Champions league quarter final puai zoh ding kan nei ih hrang Premier league club tha Liverpool in Portugal club tha Porto an rak mikhual ding.

Liverpool le Porto hi champions league thuanthu ah vei 6 an rak do aw zo ih Liverpool in vei 3 nehnak co in vei 3 an duhtawk aw.

2001 UEFA cup zuamawknak quarter final ah
Porto 0-0 Liverpool
Liverpool 2-0 Porto tiin komkhawm ah Liverpool 2-0 Porto a si ih Liverpool in Semi final an lut.

2007 Champions league group dinhmun ah
Porto 1-1 Liverpool
Liverpool 4-1 Porto, tiin kokhawm ah Liverpool 5-2 Porto ti a si.

2018 Champions league sungsuak dinhmun ah
Porto 0-5 Liverpool
Liverpool 0-0 Porto ,tiin komkhawm ah Liverpool 5-0 Porto ti a si ih Liverpool in quarter final an rak lut.

An sulhnu zoh tikah Porto in Liverpool an ngam lo zetih UEFA zuamawknak ah an neh thei hrih lo.Khualkhua ah duhtawkpi caan an nei theu nan,anmai innpi rori khalah an rak sung neknek men.Asinan,kan theih dingmi pakhat cu tui season champions league zuamawknak ah Porto an tha zetih group ah sungpuai nei loin hmaihruaitu dinhmun thawn sungsuak an rak lut.Sungsuak ah Italy club tha Roma neh ih quarter final an rak lut.Cutilai in Liverpool thatzia cu kan thei theh ih Bayern Munich rori khal Khualkhua ih sop thei an si.

Liverpool hi puai 1 lek tamsawn in premier league hmaihruaitu an si ih Porto khal hmat bang aw cekci in Potugal league hmaihruaitu sinak cu Benfica thawn an tawm aw ve.Porto lamah kehlam dungkham tha Telles ,Aboubkar an dam lo ih Liverpool lamah Gomes le Chamberlain an dam lo ih Robertson cu card ruangah puai khat hrem a si.

Tuitum an puai hrang anmai Innpi ih lek ding Liverpool rinsan sawn an sinan,Porto khal ngainep ding an si ve lo ih Champions league rak cawi zotu an si ve.